Milenta cómics: Clérisse, Isusi, McKean, Sempé, Alexpoulos, Eisner

Más cómics.

Jazz Club, de Alexandre Clérisse. Pue vese equí una versión d'enantes d'asoleyar la definitiva. Ta'n francés, pero puen vese los dibuxos, perbuenos, xeométricos, con colores fuertes y unos fondos estampáos mui especiales. L'autor diz que'l cómic fízolu improvisando. Dalgunes idegues son perbuenes (el músicu que queda ensin idegues, que piensa que desafina, que ya nun sabe tocar... y ye cuandu la xente más disfruta cola so música) pero pa mí el guión nun ta bien resueltu del too.

La isla de nunca jamás, de Javier de Isusi. Una d'eses hestories de viaxeros que resulten un poco rares pa ún, pero camiento que la xente que viaxa muncho tá avezada a esa incertidumbre, eses coses que nun tienen por qué tener xacíu plenu pa disfrutales, esi pequeñu caos. Homenaxes a Corto Maltés (nótase bien), al Principín y a otros. Isusi dibuxa mui bien, y además de maneres estremáes; unes llinies clares, pero delles vegáes xugando col blancu y pretu, o col blancu sobre pretu, como fai de cutio Frank Miller en Sin City; otres páxines dibuxáes con un estilu mui diferente, realista; otres con un estilu infantil, como de cuentu.

Cages, de Dave McKean. Si falábemos de cómo Isusi emplega dellos estilos de dibuxu, McKean xuega ya non con estilos, sinon con materiales y xéneros. La hestoria ye muncho más indefinía que nos anteriores, ye daqué muncho más filosófico; como un cuadru astrautu, que tien pinceláes pero igual nun yes quien pa dá-y un xacíu global. Cuandu narra la hestoria con viñetes normales ye cásique cine; leeeento, con muncha atención a los detalles, con encuadres y xuegos de referencies, y cuntando hestories piquiñines, doméstiques, paraleles, y dalguna d'elles (como la paisana que espera pol maríu) maxistrales. Pero tamién mete páxines que son pintures al óleu, o dibuxáes con otros estilos, o poesíes, o... Nun ye fácil sacar una conclusión, pero ta claro que ye una obra ambiciosa. Ah, tamién hai jazz.

El mundo de Sempé, de Sempé. Cuandu lleí los llibros de El pequeño Nicolás, fai muncho, encantóme la lletra (de Goscinny, el guionista de Astérix hasta que morrió) pero tamién me llamaben la atención los dibuxucos que hebía perehí. Aquellos gua.hes tan espresivos. Sempé ye un maestru, así que un llibru de chistes (vamos llamar así a les sos hestories d'un solu dibuxu, o a les sos tires, pero son muncho más que chistes) ye, cenciellamente, una obra del maestru.

Ve con Grace, de George Alexopoulos (o Alexpoulos, non sé). Una hestoria emotiva, con dalgún personaxe malu de cuentu que ye decoráu (desaxeráu) más que otra cosa, pero que sí acierta al retratar a una neña que ta mala y escribe un diariu, y a la so hermana, que tuvo que crecer deprisa. El dibuxu ye buenu tamién; recuerda muncho al manga, anque nun ye esactamente eso, y los fondos mui trabayáos. Recomendable.

Pequeños milagros, de Will Eisner. Otra novela gráfica del estilu de les que vengo comentando equí. Tamién salen xudíos, cómo non. Son un puñáu d'hestories nes que la moralexa nun siempres ta clara, pero el dibuxu y la manera de contar son les del Will Eisner maúru, qué más se pué decir.