Testu n"asturiano Milenta cómics: Miller, Giménez, Eisner, Torres

Préstame apuntar equí delles coses que aprendo, o llibros que lleo. Y lo que tienen los cómics ye que lléense mui rápido. Asina que tengo pendiente apuntar coses de media docena d'ellos. Y nun quiero tar sacando artículos tol ratu (ya me paez que saco demasiáos), asina que voi apuntar dellos xuntos.




300, de Frank Miller y Lynn Varley. Lleí el famosu cómic, nel formatu apaisáu, y prestóme. Nun vi la película. Home, tá bien, pa quien-y gusten los dibuxos de Frank Miller (menos escuros y "feos" que en Sin City), anque pa mí que el color tamién axuda muncho (gustóme cásique tanto como los dibuxos), y nun ye de Miller, sinon de Lynn Varley (que paezme que yera la muyer). Tá bien, pero nesto del arte paezme que coyen a ún, camúdenlu en lleenda y ya tolo que fai ye una xenialidá. Tampoco ye pa tanto. Pero ye un buen cómic.
Érase una vez en el futuro, de Carlos Giménez. Una obra más del maestru del cómic, na so llinia. Ye un trabayu basáu en hestories de ciencia-ficción, curiosamente delles de Stanislaw Lem (un autor non mui conocíu). El dibuxu ye... pues el de siempres de Giménez (pa qué decir más) y el llibru ye un poco duru, con escenes crueles ya dende la primera hestoria. En el so sitiu web pues mercar páxines orixinales, por mil eurucos o asina. Munches vegáes me entró la tentación de mercar dalguna... pero son munches perres, y aguanté la llocá (porque nun ye otra cosa que rixu).
La Conspiración - La historia secreta de los Protocolos de los Sabios de Sión, de Will Eisner. Si Giménez ye un maestru español, tolos críticos y dibuxantes tienen a Will Eisner como el maestru númberu un del cómic modernu. Esti, además, ye el so trabayu caberu enantes de morrer. El llibru trata sobre un llibru contra los xudíos (Eisner yéralo) que paez que lleva circulando dende fai un sieglu (anque yo nunca nun sintiera falar d'él, na mi ignorancia) y Eisner cuenta la so hestoria y cómo ye totalmente falsu. La hestoria ye en plan documental, non ye mui interesante (y lo mesmo que la xente cree en el llibru pa odiar a los xudíos, pa daquién ignorante como yo igual podía ser mentira lo que cuenta Eisner) pero loas dibuxos sí que son de maestru, hai que reconocelo. Les páxines son de papel tirando a mariellu, y los dibuxos tienen unos trazos, unes solombres, y sobre todo un amestu de llínies clares con fondos d'acuarela borrosa que son una maraviya. De verdá que merez la pena lleélu namás que pa ver estos dibuxos.
Roco Vargas, de Daniel Torres. Ye un conxuntu d'hestories futuristes alrodiu de Roco Vargas, un héroe románticu, que vive na dómina del cine pretu y lleva un chigre como el de "Casablanca", pero al tiempu nel futuru de los viaxes espaciales y les guerres entre los planetas del Sistema Solar (que tan toos habitáos), porque Roco en realidá ye pilotu de naves espaciales retiráu, pioneru de los viaxes interplanetarios. Ye un cómic de llinia clara, con algo del estilu de Serge Clerc y otros semeyos, con los sos coches grandones de los años cincuenta, los clubs que se llamen "Mocambo" y coses así, y al tiempu cola atmósfera de "Sky Captain y el mundu del mañana". El dibuxu del protagonista nunca nun acabó de convenceme, pero el mundu que dibuxa Torres al so alredor sí ye daqué al tiempu trabayáo ya inspiráo. Ye futurista, pero consigue que seamos nostálxicos de sitios asina (onde nun tuvimos ni taremos).


Tengo más pendientes, pero pa ahora val. Otru día más.