Testu n"asturiano Milenta cómics: El Cubri, Lepage/Rieu, y más Miller y Eisner

Sigo faciendo por ver más obres de esa maraviya que ye'l cómic, la historieta o, como diz el maestru Will Eisner, el "arte secuencial".

Sombras, de El Cubri (Cava y Arjona).Non, lo de dibuxar figures pretes, con munches solombres, garrando lo meyor del cine negru, en blanco y negro feroz, nun lo inventó Frank Miller. Nin El Cubri. Pero ficieron un trabayu estupendu. Hestories curties de toos esos perdeores, muyeres-oxetu, detectives y hampones, de toes eses derrotes diaries y de fatalidá. Too ello, claro, con jazz de fondu.
Fagin el judío, de Will Eisner. Tolo que dixe de La historia secreta de los protocolos de Sión pue decise equí. Otra obra del mesmu estilu, con el mesmu dibuxu xenial, y tamién, de pasu, bastante pro-xudía.
Ronin, de Frank Miller (color de Lynn Varley). Esti gustóme menos que 300. Non ye que tea mal, pero el dibuxu paezme más duldosu; el estilu caóticu que funciona'n Sin City paezme que equí queda un pocoñín confusu. Eso sí, encantóme cómo igua les viñetes, cómo tienen ritmu, cómo delles páxines repiten el mismu mapa de viñetes... Miller ye buenu, nun se pue negar. Pero la manera de resolver l'argumentu ye tramposa, pal mi gustu.
Alex Clément ha muerto, de Lepage y Rieu.Una hestoria que, con fondu tráxicu, conviértese nuna comedia d'enredu. interesante, bien dibuxá, con esi gustu pa pintar colos grises, con técniques que de xuru que daqué-y deben al cine, con dalguna viñeta gloriosa y detallista. Pincha nel iconu a manzorga pa ver (non mui bien, pero val pa facese una idega) un exemplu d'una páxina.