Enquivocase ye humano

Va tiempu que vengo pensando'n lo importante que ye que los políticos rindan cuentes de lo que faen. Y eso pasa por que almitan cuándu s'enquivoquen. Hasta'l puntu de que pensé que, pa decidir a quién merez la pena votar nes eleiciones, envede facer casu a lo que prometen o al so programa electoral (que ye papel moyáo), valía más contar cuántes vegáes dicen: "Enquivoquéme". Asina, sin dar vueltes.

Nos días siguientes al atentáu de la T-4 oyí a Zapatero decir que s'enquivocó cuandu dixo que "dientro un mes díbemos tar meyor que güey" nel asuntu del terrorismu. Home, nun va herniase por almitir lo evidente, pero los políticos nun tienen el vezu de almitir lo evidente, más bien de mentir delantre les nuestres ñaples; asina que eso podía vale-y un puntu positivu. Pensé incluso en facer una llista y dir contando.

Güey lleí que Aznar almitió que nun hebía armes de destrucción masiva'n Irak. Púnxeme contentu, y diba a pone-y otru puntu a Aznar (anque nun me paez que vaiga a presentase a nada no que yo tenga drechu al votu). Pero dempúes de acudir a la fonte y ver el vídeo coles declaraciones, nun pueo pone-ylu. De verdá que quería. Pero non. Asina nun val.

Lo que fai Aznar nun ye almitir que taba enquivocáu nun asuntu tan importante. Lo que fai ye decir que nun s'enquivocó. Y de pasu... miente.

Fai alusiones personales al que-y entrugó, comparándose con él pa dexalu'n evidencia (anque lo que algama ye lo contrario). Diz que tol mundu camentaba que'n Irak hebía armes de destrucción masiva, y eso ye completamente mentira: la invasión foi'n marzu de 2003, y en xineru los inspectores de la ONU dixeron otra cosa: que Irak cooperara "bastante bien" (Hans Blix), y que nun atoparon actividaes nucleares y necesitaben más tiempu pa trabayar (Mohamed El Baradei). Dixeron lo mesmo en xunu, que nun atoparen ná (nun quier dicir que nun haiga, pero cenciellamente tampoco que haiga). En setiembre de 2003, ya ensin torgues pa buscar les armes, volvieron a decir que nun atoparen ná.

Diz que cuandu él nun sabía que nun hebía armes, naide nun lo sabía. Si ni los inspectores, y non digamos la xente (que nun tengo memoria de ver a tanta xente d'alcuerdu), nun creíen lo de les armes, nun sé a qué se refiere'l ex-presidente con "tol mundu". ¿Quién queda?

Como fai siempre, ponse tou importante y diz que torear con cinco años de retrasu ye fácil, pero decidir en el momentu non. D'alcuerdu, pero chavalín, esperaste a 2007 pa decir que ye evidente que nun hebía armes, pero'n 2003, a poco d'entamar la guerra, ya se vio que yera too patrañes. Nun ye, además, cosa de "tol mundu cree"; dixiste que teníes información reservada. El 18 de febreru de 2003 dixiste nel Congresu que los inspectores atoparan armes, y ya entós retrucáronte con rumores, como diz el diariu sesiones:

¿Cómo es posible que usted pregunte si hay armamento químico o biológico, señoría, cuando los propios inspectores de Naciones Unidas han constatado armamento químico y biológico no declarado por Sadam Husein? (Rumores.)

Taba encantáu de ponete el puntu positivu, pero eso ye trampa. Eso nun ye almitir que t'enquivocaste. Eso ye siguir cola tu habitual soberbia y chulería, y esquivar la to responsabilidá.