El mi lote de software llibre pa estudiar música

Cuando ún estudia música, bien ceo fáen-y falta dellos programas pa sofitase. Por exemplu, muncha xente usa:

• Finale, o Sibelius, o otros programas semeyos, pa escribir les partitures.


• Band in a Box pa xenerar acompañamientos y practicar los temas, improvisando enriba.


• Transcribe! pa estudiar grabaciones de los grandes, y copiar los solos. Como los grandes, delles veces, toquen rápido, Transcribe! val pa executar les pieces más despaciu, a voluntá; y además déxate executar, y repetir, cachinos de canción, lo que ye mui útil pa poder oyir lo que toquen, y tamién pa practicar con ellos.


• Earmaster pa entrenamientu auditivu. Hai que facer ximnasia col oyíu, entrenase, pa identificar los intervalos ya los acordes. Earmaster xenérate intervalos y acordes pa que los aldovines.


• Un metrónomu, imprescindible pa estudiar si lluéu quies tocar medianamente bien; lo suyo ye usar un metrónomu de verdá, pero también los hai software. Esto nun tien misteriu dalu; hai milenta en llinia y pa descargar, gratuitos.


• Programas de edición de soníu, tipu Cubase, pa grabar los exercicios o los trabayos d'ún, editar les pistes, amestales, etc.

Toos esos programas funcionan perbién, y además ye bona cosa deprender a usalos, porque ensin querer ún pue atopase faciendo coses d'eses "profesionalmente" y nunca nun ta de más. Pero tienen inconvenientes. Ún, que delles veces tienen milenta más coses de les que ún necesita. Otru, que igual nun los hai pa la plataforma que usa ún. Y otru... que cuesten perres. Si quies el Finale, el Transcribe!, el Band in a Box y el EarMaster, y suponiendo que compres les llicencies académiques o doméstiques, prepara 400 € (sólo el Finale ya val 261 € na llicencia académica).
De xuru que esos programas valen eses perres, porque son programas perbuenos. Pero igual tú nun necesites toles característiques, o cenciellamente nun quies gastar les perres, o trabayes en Linux o... Pues hai alternatives (más sencilles, claro) en software llibre, que en dellos casos tan feches con Java y, poro, puen funcionar en otres plataformes.
Equí va la mi llista de programas útiles.

Edición de partitures

Lilypond. Ye un programa pa editar partitures, pero cuidáu: nun ye un programa al usu, sinon más bien un llinguaxe de programación. Nun ves la partitura hasta que la xeneres. Lilypond vien a ser al Finale lo que LaTeX ye al Word; pues facer virgueríes, pa dalgunes coses va tener más potencia que col editor WISYWIG, pero pa deprender a usalo va llevate más tiempu, y cuando quies facer dalgo nuevo tienes que buscar cómo se fai. Hai que tener el calter, el temperamentu afayaízu pa usalo. Si lu tienes, ye una ferramienta tremenda. Echa un vistazu al proyeutu Mutopia pa ver que la xente escribe coses series con Lilypond (ah, y nun pagues por partitures clásiques, que ehí hai milenta, llibres y llegales).

• Páxina de Lilypond


• Lilypond Snippet Repository, cachinos de códigu de exempl
  


• Mutopia Project, partitures llibres feches con Lilypond

MuseScore. Un programa pa editar partitures, WYSIWYG, más al estilu de Finale. Pues trabayar en Windows, Linux y Mac, y trai dalguna plantilla pa partitures de jazz; además, la versión 1.1 manexa bastante bien los nomes de acordes.

• Páxina de MuseScore

Acompañamientu automáticu

Impro-Visor.
Un programa pa ayudate a improvisar. Paezse al Band in a Box, porque tamién pues poner ellí los acordes y él xenérate un acompañamientu. Pero por exemplu tamién pues dá-y a un botón, y enriba los acordes él invéntase una frase y píntatela ellí. Un proyeutu perinteresante.

• Páxina d'Impro-Visor

Transcripción de solos

SlowMP3. Un programa lo bastante parecíu al Transcribe! como pa usalu. Incluso tien un tecláu de pianu abaxo, onde te va marcando les notes que él cree que suenen (cosa non mui útil, porque eso ye lo bastante difícil como pa que el ordenaor nun lo faiga bien, salvo que tea un instrumentista tocando casi solu). Un inconveniente: dexa poner la música más despaciu, pero non más rápido (aunque la verdá ye que eso faise poco). Recomendable.

• Páxina de SlowMP3

BestPractice. Col BestPractice pues apañate, y tienes el códigu fonte, y ye gratis, anque la interfaz ye más rudimentaria que la del SlowMP3. Una cosa que igual interesa ye que esti pue trabayar direutamente a partir d'un CD de música, y non necesariamente d'un MP3.

• Páxina de BestPractice

Entrenamientu auditivu

EarToner. Val, el EarMaster tien más coses, y sálente iconos más guapos, y... pero pa lo que ye esti programa, esti funciona perfectamente, y yo ye el que uso. Pues xenerar intervalos, acordes, escales... ascendentes y descendentes... Nun fai falta más. Nun hai motivu pa pagar por otru programa. Java, se supón que funciona en cualquier plataforma.

• Páxina d'EarToner

TkSolfege. Úsolu menos, porque ta un poco más orientáu al dictáu musical y yo nun faigo muncho d'eso. Pero ye otra opción pal entrenamientu auditivu.

• Páxina de TkSolfege

Virtual MIDI Piano Keyboard. Paez una pijada, pero delles veces lo que ún necesita ye, namás, un pianu pa tocar dalguna nota. Pues yo uso esti, que ye un xeneraor MIDI. Tamién visualiza en tiempu real, nes tecles del pianu, los eventos MIDI que-y lleguen, así que pue usase pa deprender a asociar soníos al pianu.

• Páxina de VMPK

Edición de soníu

Audacity. Pa iguar les mis grabaciones, yo uso Audacity, y puntu. Nun ye ningún descubrimientu orixinal. Agora, si vas usar MIDI, o quies xenerar les pistes con instrumentos virtuales, o lo que sea, pémeque Audacity nun te val. Pero pa grabar les pistes y editales... ye de sobra. El día que la to música non suene bien por culpa d'Audacity, ye que yes un músicu del copón y faes bien tolo demás.

• Páxina d'Audacity

Bueno, estos son los que yo conozo. Si conoces más, y quies falar d'ellos, o opinar d'estos, pa eso tan los comentarios.