Testu n"asturiano Xente anónima

Delles veces, gracies a Internet, ún atopa xente que naide conoz, pero que tien dalgo. Dalgunos d'ellos lleguen a ser más conocíos, anque güey ye difícil saber qué ye ser famosu, pola fragmentación y variedá y ufierta enorme que hai (ya nun nos sentamos toos delantre la televisión a ver lo mesmo; ún baxa series d'equí, otru discos d'allá...)

Asina que voi nomar equí dalguna xente que me llamó la atención; por orixinales, por tener un gustu peculiar, por téunica, por facer música "artesana", lo que seya. Si son famosos, nun son superestrelles, que yo sepa.

Terra Naomi

Pue que seya la más "famosa", por un ciertu boom que tuvo'n Youtube. Entamé a escuchala porque me gustaron les sos canciones, y tien una voz guapa, clara; limitábase a cantar, tocar el pianu o la guitarra, y grabase con una cámara permala. Col tiempu acabé comprándo-y dos discos. Un canciu d'ella de los que más me gusten quiciabes seya esti:



Tamién fai versiones. Por exemplu, gústenme abondo My Chemical Romance. Sí, son un ratu emos y un ratu goticucos, pero hai que saber perdonar, y la música préstame. En particular, un canciu que tienen que se llama Helena. Pues Terra fizo una versión (pasándola a... ¿6/8?)



Giuliano Ligabue

Nun ye fácil atopar cantantes homes, porque ta enlleno de muyeres. Pero esti, Giuliano Ligabue, aparte de cantar, toca un ratu, y además tien una Eastman (eso sí, de siete cuerdes, ¡glub!). Enantes de facer el solo graba el acompañamientu con un pedal, mientres canta. Un máquina.



Albanie

Una moza lánguida, medio moza medio garçon, que canta con esa desgana cola que hai que cantar les canciones vieyes del swing, que toca una guitarra tipo Selmer d'eses de la onda manouche, y que ensin paecer virtuosa de ná, se monta bien la so película.



Pomplamoose

Un dúo de cachondos mentales, con otra cantante lánguida pero que sabe lo que se fai. Faen versiones... mui, mui personales. Hai que velos. Por exemplu, esti clásicu, obligatoriu de tolos conxuntos vocales de moces, pero que equí graba ella sola. Bueno, sola no; col otru elementu tocando armonios, acordeones, bateríes, xilófonos y pianos de xuguete...



Pero la cosa nun queda ehí; puen graba tranquilamente a Michael Jackson, o a... Aerosmith:



En fin, otru día ya apuntaré más xente.