Testu n"asturiano Marco y Mapi en L'Esperteyu

Equí ya falé delles vegáes de Marco Martínez y de Mapi Quintana. Bueno, pues lleven un tiempu faciendo un Homenaxe a Ella Fitzgerald y Joe Pass. Ellos dos solos, cola guitarra y la voz. Vílos nel so debú en La Palmera, en Pola, y vilos ayeri, dellos conciertos dempués, nel Esperteyu, n'Uviéu.

L'Esperteyu ye un chigre guapu, una cervecería con muncha maera y meses separtáes por vidrieres. Y ayeri yera un sitiu mui afayaízu pa escuchar música; non había muncha xente, y taba más o menos atenta.

Yo soi un poco vagu (y poco mitómanu) pa según qué coses, y tocó John Scofield en Xixón, y nun fui a velu, y tocó Martin Taylor y tampoco fui a velu. Nun tien perdón. Pero lo de ayeri nun me lo perdía yo por nada. Prestó pola vida.

La guitarra de Marco ayeri sonóme de les meyores veces que lu vi tocar, y tovía meyor dempués del descansu. Llevo tiempu estudiando con él, ya sé cómo les gasta, pero ayeri quedé cola boca abierta, de la varieda d'acordes y de dixitaciones que punxo, de la música que fizo. Increíble. Pueo decir que eso, que estudio lo que pueo, pero por más que miré, malapenes pude reconocer lo que él facía tan fácil. Igual que cualquiera que nun sepa tocar un ren. Tala ye la distancia a la que ta la música que fai él.

Y de Mapi Quintana, pues bueno, nun hai muncho que decir, porque ya falé d'ella delles veces nesti blog; namás hai que oyila. "La meyor cantante d'España" nun ye una sola, claro, hai muncha xente; pero en teniendo eso en cuenta, Mapi Quintana ye la meyor cantante d'España. Porque nun creo que les haya con meyor mestura de voz, gustu y téunica.

Nature boy ye un canciu que, nun sé por qué, nun me gustaba (nun yera yo mui fan de Nat King Cole). Pero ayeri, tal como la ficieron ellos, si nun eché la llagrimina foi porque soi un paisanu y nun lloramos. Vaya obra d'arte. Y si los oyes facer My man, o Love for sale, o... cualquier otra cosa, pues eso, entrugaráste cómo ye que pues velos gratis nun chigre, y nun tan nun hotel de luxu'n Las Vegas o perende.

En fin. Siendo músicos como estos, nun fai falta más que una guitarra y una voz. Anque el ampli nun suene del too bien, anque por culpa del fumo de los gochucos de siempre la voz sufra. Si pues dir velos, vete, porque merez la pena.

3 comentarios:

Niña hechicera dijo...

Y yo coxa perdía,co´l llumbar averiau y teniendo que dar delles clases extra ta les tantes....
sniff!!

:)

Manuel Cernuda dijo...

Yo lo pase como un enano ^^!

Pablo Texón dijo...

La verdá ye que foi impresionante