Testu n"asturiano Ya ta'l dañu fechu (II)

Un blog val tamién p'alcordase de cuándu un fizo dalguna llocáa.

Va ya pa cuatro años que merqué una Ibanez Artcore AG75. Toi feliz con ella, pero agora apetecíame mercar una guitarra un pocoñín meyor, que sonara bien ensin enchufar; de caxa más grande, y talláa o sólida envede lamináa.

Les guitarres de caxa arqueá, les archtop como les llamen los ingleses (eso quier decir que tienen la tapa curva y non plana; como los vigulines), son de dellos tipos. Les más barates, como la mi Artcore, polo xeneral son "lamináes"; fáense pegando delles llábanes fines de maera. Son más barates, anque suenen menos (en acústico, se entiende). Lo siguiente ye les "sólides", que son como lamináes pero con namás dos o tres capes de maera. Y el siguiente peldañu ye cuando la tapa de la caxa ye una sola pieza de maera, talláa a mano; son les guitarres "carved", o "talláes". (Cuidáo, hai guitarres lamináes buenísimes y carísimes; esto ye namás una parte del cuentu, pero una parte importante.)

Una guitarra carved fecha por un luthier artesanu pue costar un montón de perres. Pero hai un par de marques (cásique imposibles d'atopar n'España, claro) que fabriquen buenes guitarres a un preciu afayaízu; y una d'eses marques ye Eastman. Tan feches en China.

Pues yo, que miro muncho poles perres, foi a buscar una Eastman, y además de segunda mano. Y así merqué esta belleza de al lláu; una Eastman AR805CE. La Artcore era sunburst, o sea, "requemáa polos bordes", pero esta non; esta ye "classic", color mueble de maera ensin más. Munches guitarres tienen les pastilles mounted, y eso quier decir que se faen furacos na tapa pa meteles; afuracar una tapa d'estes sedría un crimen, y estes guitarres lleven pastilles floating, pequeñines, encima la tapa.

Tovía nun pude probala muncho, pero pémeque ta perguapa. La mía nun ye asina, esactamente; el clavixeru nun ye coles clavixes negres como esi, ye doráu. Pémeque la mía ye de les primeres tandes, y esi clavixeru negru punxéronlú más sero. Pero bueno, ye bastante semeya.

Pues eso, que ya tá'l dañu fechu (otra vez). Cuando la bocatonta quiera berrar un poco, igual pue acompañala esta.

Pa'l siguiente caprichu, dientro cuatro años, ya dirá esta. O esta más clarina. O esta, que suena perbien. O esta, guapísima. Hasta una d'estes me valía.

2 comentarios:

Rose Holiday dijo...

Ta per guapa!!! ,enhorabuena por la compra,hombre,la vas a disfrutar de lo lindo.
Y por cierto...ya tengo el mono sólo con ver la foto y eso que nun ye igual que la tuya...
Tamos a punto de terminar la obra,a partir de noviembre,cuando quieras.
Gracias.
Ya sabes,cualquier cosa en CMaj,Am.
:)

Marta dijo...

¡Qué bien sienta darse algún caprichito de vez en cuando! ¿A que sí? Muy chula la guitarra, espero que algún día que vaya a Asturias me cuadre con una de tus actuaciones y pueda ir a que me firmes un autógrafo. :D