Un Contador con tolos ceros

Ayeri, nel telediariu, falaron del positivu de Contador por clembuterol.

Ye ñidio que los periodistas nun avezan ser precisos. Pero nesti telediariu dixeron la concentración de clembuterol que atoparan na orina de Contador. Y dixéronlo lleendo toos los ceros: cero coma cero cero cero... cero cero cinco. Como aquello de "ce ce o o". Pa que te faigas una idega de lo pequeña que yera la concentración y lo buen chaval que ye Contador.

Y agora tol mundu opina porque "yos paez mui poco clembuterol", asina que ye inocente.

Y digo yo: ¿qué cantidá de clembuterol ye grande? ¿Qué cantidá produz un efectu nel cuerpu? Porque ye increíble lo muncho que sabemos, la xente y los periodistas.

Polo visto, una concentración por enriba de 0,000000009 gramos por mililitru produz síntomas que la persona pue notar (falamos d'intoxicaciones). La concentración que-y atoparon a Contador ye muncho más baxa, sí; de 0,00000000005 gramos por mililitru. Ye menos de la centésima parte. Pero fáime mui feliz que la xente, que de cutio nun distingue un centrímetru d'un centímetru cuadráu, a primera vista distinga con claridá 0,000000009 de 0,00000000005. La enseñanza de matemátiques nun tá tan mal.

Tampoco la de bioquímica; porque la xente sabe a qué ritmu se desfai el cuerpu del clembuterol (la "vida media", que llamen), y sabe valorar que 0,00000000005 cuando te faen el control nun quier decir que durante la carrera tuvieras de productu hasta les tranques.

Lleendo'l informe que Contador encargó a un espertu, y anque tá nun inglés permalu, si lo entendí bien pue ún enterase de delles coses:

- Hai sustancies dopantes que puen tener orixen nel to cuerpu; por eso hai un umbral enantes de castigate. Si tas por debaxo, déxente tranquilu, porque se supón que ye natural.
- Hai sustancies que'l cuerpu nun produz, siempres tienen orixen esternu; por eso nun hai umbral, y si te atopen lo que seya, castíguente. El clembuterol, por desgracia, ye una d'elles.
- Los llaboratorios que faen análisis nun son toos iguales. Unos detectan meyor, otros peor. El organismu que lleva los controles desíxe-yos una "sensibilidá" mínima, que llamen el MRPL.
- El MRPL pal clembuterol ye 0,000000002 gramos por mililitru (2 ng/mL). Quier decir que un llaboratoriu que seya capaz de detectar una concentración de clembuterol de 2 ng/mL val pa facer les prebes, anque ya nun seya capaz de detectar, por exemplu, 1 ng/mL.
- A Contador detectáron-y 0,05 ng/mL. Pa ser esactos, polo visto emplegaron métodos "non cuantitativos", y "estimen" que tenía 0,05 ng/mL.
- Eso nun quier decir que tea por debaxo del límite de sanción, porque NUN HAI límite de sanción; por enriba de cero ya tás fritu. Así que Contador tien un problema gordu.
- Lo que quier decir ye que pue haber llaboratorios homologáos pa facer estos controles que nun hubieren sío capaces de detectar esa concentración.
- El que fizo'l informe (que nun ye más que un peritu al que llamó Contador) fai la suxerencia de que nengún llaboratoriu ponga nos informes una cantidá por debaxo del 10% del MRPL. Pero eso ye una opinión d'él.

Con too esto nun quiero decir que Contador seya culpable; quiero decir que tien un problema. Y quiero decir tamién que eso de que 0,05 ng/mL ye "mui poco" paezme una afirmación mui llixera por parte de la xente; porque diríen que yos abulta "muy poco" 0,00000009 gramos por mililitru, que por embargu ye una concentración como pa tar nel hospital por intoxicación.