Ya ta'l dañu fechu

Esa ye la frase que decimos en casa cuandu ún gasta perres o fai algo de lo que nun taba seguru.

El casu ye que ayeri fice daqué mui raro pa mí. Merqué una cosa'n e-Bay. Y encima, esa cosa foi una guitarra que nun probé. Nun soi un comprador compulsivu, y además nunca fui de los que ajunten guitarres, precisamente (llevo 24 años tocando, y siempres tuve cola misma que me regaló mio má cuandu terminé la carrera; y a los 30 o por ahí merqué una guitarra "de verdá", una Fender Stratocaster. Y para de contar). Y'n e-Bay enxamás comprara nada. Nun sabía ni cómo se facía. Fice una puja, namás que una, y tocóme. Asina que espero que salga too bien...

Quería tener una guitarra de caxa, con pastilles Humbucker, lo más estremáo posible de la Stratocaster. La que merqué ayeri foi esta preciosidá d'aquí al lláu. Ye una Ibanez Artcore AG75. Baratuca, pero dicen que mui apañá pa les perres que cuesta.

Ya lo veremos... pero anque tuve munches duldes, al final díxeme que tamos equí cuatro díes, y que a los mis años ya ye hora de poder permitise comprar una guitarra de cincuenta mil pesetes. Así que... ya tá'l dañu fechu.