El Colexu que nun quiero

Siguiendo coles reflexiones sobre la regulación de la profesión informática, un par de notes cencielles. Daqué que se escaez munches vegáes. Muncha xente da por xuro cómo ye un colexu profesional, pero equí ta lo que yo pienso sobre cómo quiero que seya el míu, y pémeque se suponen demasiáes coses que nun hai por qué suponer:

Ensin colexación obligatoria. Toi pola regulación de la profesión, pero eso nun quier decir necesariamente que haiga que colexase pa exercer. Veo el Colexu comu una institución llegal y comu un valor añadíu; del colexu échente si cometes faltes graves, y queda apuntáo lo que ficiste. Además, el colexu da formación a bon preciu, actualizada... Y dellos otros servicios que son buenos pa un profesional. A mí, que el que me atiende tea colexáu abúltame que ye una seguridá añadida. Pero el que nun lo vea asina, ta nel so drechu. Nun me paez que tenga que ser obligatorio colexase pa que el colexu faiga la so xera.

Ensin cuotes abusives o obligatories. Si lo anterior ye verdá, nun fai falta decir muncho más, porque ensin colexación obligatoria, les cuotes difícilmente diben ser abusives. Habrán tener un preciu que a la xente-y paeza xustu.

Ensin trámites obligatorios. Por exemplu, el visáu o coses asina. Anguañu muncha xente refuga tener que pagar perres al colexu d'arquitectos, por exemplu, pa visar cualquier planu, y eses cuotes abúlten-yos abusives. Yo veo el visáu y coses semeyes comu una garantía más, un grau de seguridá no que se fai. Si ún quier custodia del códigu fonte, habrá pagalo, y sedrá porque-y paez que lo necesita. Pero nun hai por qué pensar que vaiga ser too obligatorio y caro. Ye un serviciu que agora nun da naide, y que asina daría daquién; na más.

Otra cosa, claro, ye que una alministración, o una empresa, considere que ye útil o importante un visáu pa tolos sos proyeutos, y lo ponga como norma. Pero eso nun me paez mal; nun me paez peor que pedir la ISO 9001, o cualquier otra triba de compromisu o sellu de calidá. Si ye el del colexu, pues como si ye otru que nun mos escandaliza.

Total, que delles idegues sobre cómo ye un colexu tan sacáes de cómo son otros pervieyos. Yo quiero igualdá de condiciones pa la mi profesión, y la misma dignidá que pa otres; pero eso nun quier que a la fuercia haiga que importar tolos vicios o erros de tolos demás. Además, hai que alcordase de que munches de eses imposiciones de otros colexos diben ser mui difíciles de asitiar güey, por muncho que dalgún lo quixera. (Nel tiempu que tuve trabayando col colexu d'Asturies, enxamás se faló de les coses anteriores; por exemplu falóse de ufiertar visáos, pero nunca nun sentí falar de trabayar pa que foren obligatorios. Nin se mos ocurrió.)