Titulitis

Va tiempu que toi d'alderique con xente sobre los colexos profesionales y la regulación de la Inxeniería n'Informática, y como veo que tamos tol ratu tracamundiando idegues, y entendiéndonos mal, voi facer lo que fice otres vegáes: escribir lo que me paez a mí, a ver si m'aclaro yo lo primero, y si a daquién-y sirve pa aclarase tamién, meyor.

Toi fartu de lleer tópicos que son mentira. Pa lo único que valen ye pa discutir sobre coses nes que munches veces los que discuten... tan d'alcuerdu. Así que voi dir falando de ca tópicu por separtáo.

Y lo primero va ser eso de la titulitis.

Argumentu: el títulu nun lo diz too, lo importante ye saber.

La mi opinión: ¿Pensástelo tú solu, o ayudáronte? Claro que nun lo diz too.

Lo importante ye saber. Y ¿cómo demuestra ún lo que sabe, ante un organismu oficial, por exemplu? Non, nun val "yo conozo a esti y ye perbuenu". Si valiera eso, muncha xente de los organismos oficiales diba escoyer a los amigos de so, valieren o non. Hai que demostralo. Documentalmente, en igualdá de condiciones colos otros aspirantes, de manera pública.

Una manera de demostralo ye un desamen. Y pa delles coses fáense. Les oposiciones, por exemplu.

Pero si lo que hai que demostrar ye una formación integral, llarga, de tres mil hores presenciales nun entornu mui desixente y avanzáu, diba haber que facer un desamen escomanáu. Diba durar meses.

Yo, que faigo y iguo desámenes, sé que nengún desamen ye xustu del too, que lu pasa xente que nun tenía que pasalu, y al revés. Que daquién que apreba un desamen pue ser un mazcayu por nun saber tratar a la xente. Hai milenta coses que decir. Y toi d'alcuerdu con too eso. Pero un desamen ye un mal menor. La alternativa ye abondo peor: fiase de les apariencies, o de la pallabra del aspirante. Y colos títulos pasa lo mesmo.

Si voy escoyer a un candidatu pa un puestu pal que quiero que quede constancia de que sabe una serie de coses, desamínolu. Pero si quiero a daquién con una formación integral en una estaya del conocimientu, de eses que requieren años pa completase, nun pueo poneme a desaminalu yo de too, y ver si sabe desde restar y dividir hasta lo más especializao del puestu qu'ufierto. Si tien el bachilleratu, doi por fecho que sabe restar y dividir. Igual nun sabe, pero ye razonable enfotase nel títulu de bachilleratu.

Pa la educación superior, lo mesmo. Si tien el títulu de X, y hebo una organización como la Universidá, que dedicó decenes de persones y de hores de desamen pa verificar esos conocimientos, y sé que les universidáes tan controlaes pol estáu y poles leyes, y que les cumplen razonablemente, y tol mundu ta en igualdá de condiciones pa estudiar, pues doi esos conocimientos por desamináos. Y faigo un desamen ya de lo último, el que me dexa a mí distinguir entre un bon candidatu y otru bon candidatu.

Eso nun tien nada de titulitis. Ye lóxica pura.