Testu n"asturiano Milenta cómics: Adiós, Chunky Rice, de Craig Thompson


Equí ya falé de Craig Thompson y esi llibru tan importante que ye Blankets. Y d'aquella menté Good Bye, Chunky Rice, otru llibru con buena crítica.

Pues atopélu por fin, y lleílu. La mi muyer lleólu en dos tirones.

Nun sé si falar d'obres maestres, pero tá claro que Adiós, Chunky Rice ye un comic redondu.

Ye bien estremáu de Blankets. Equí los dibuxos son más caricaturescos, y los personaxes son como de fábula pa neños. Nun sé si ye un llibru pa neños, pero si lo ye, dende lluéu que nesti casu ye un datu positivu.

Ye más esperimental que Blankets, ta fechu de delles hestories que se crucien, hestories que delles vegáes son sorprendentes, o rares, o caótiques. Pero que, sin saber por qué, tienen tol sen.

Otra cosa importante ye que esti llibru ye cuasi una enciclopedia del cómic. Si ún llee les tribes de transiciones entre viñetes de las que se fala'n Entender el cómic, de Scott McCloud (un llibru que, sí, ye una obra maestra que tolos aficionaos al arte hebíen lleer) en Chunky apaecen toes. Les páxines tan iguáes por un maestru, pensáes, equilibráes, y unes viñetes intégrense'n otres de milenta maneres. Nuna ocasión les hermanes siameses falen n'estilu indireutu de lo que dixo un mélicu, y una corrixe a la otra, y lluéu la primera diz la frase'l mélicu... La manera na que ta resuelto esto cola gramática del comic ye cenciellamente maxistral. Cada páxina ye un esperimentu, una preba pa ver a ónde llega la capacidá espresiva del cómic. Pero eso sí; el dibuxu ye sencillu, humanu, plásticu, perfácil de lleer. Son les viñetes les que falen a través de esi dibuxu.

La hestoria ye pa recordala: la amistá, los amigos que nun tan, cómo vinimos a esti mundu pa sufrir pero tamién pa que dalgún hermanín nos axude a llevalo. Pa mí que esti comic nun ye la hestoria de Chunky Rice y Dandel; ye la hestoria de esi gran personaxe que ye Solomon. Chunky y Dandel son un envoltoriu perfeutu, como les cais son un envoltoriu pa les viñetes.

En resumen, un llibru cuidáu hasta el mínimu detalle, que entama y termina con un "clunk" de Dandel a Chunky que diz más coses que munches hores de cine de Hollywood, y que hai que lleer polo menos dos veces.

2 comentarios:

Fer dijo...

¿Ónde lu topaste? Dende llueu Blankets ye una pasada... leílu una tarde-noche de gripe fadrá dos años y la verdá ye q impactome bastante... pero esti nun lu topo ni pa Dios...

Guti dijo...

Blankets son pallabres mayores, sí :-) Esti debieron de sacalu (la editorial, digo) fai poco. Yo saquélu de la biblioteca (la de Uviéu, nel Fontán) y nun lu viera hasta el otru día, así que debieron de mercalu fai poco, tamién (toi seguru de que enantes non lu teníen, que cuando lleí Blankets busquélu).