Milenta cómics: Emigrantes, de Shaun Tan

L'otru día, nun comentariu a un artículu sobre cine mudu, faláronme de Shaun Tan, al que nun conocía. Dixe que diba buscar el llibru, y 48 hores dempués ya taba lleíu. El comentariu nun me valió sólo pa atopar a Shaun Tan; tamién pa descubrir la biblioteca de La Granda, un tesoru nel mediu'l campu San Franciscu. Una biblioteca infantil y xuvenil, pero que a los efeutos tien una coleición de cómics que completa perbién a la biblioteca'l Fontán. NUnca entrara nella, y agora van veme perellí a menudo, me paez.

Emigrantes ye otru de esos cómics que faen del xéneru un arte. Cada viñeta ye un cuadru maraviyosu. Ye una hestoria ensin pallabres, pero nun faen falta. Améstense los detalles de la vida d'un inmigrante, la confusión, el ablucamientu, la indefensión... con una estética que d'un llau val pa que el llector tea como'l protagonista, ensin saber bien qué son les coses que ve ni qué dicen los cartelos que llee, pero d'otru llau resulta onírica, orixinal, llamativa.

Shaun Tan cuenta la hestoria dende los detalles, dende duchase, mercar comida, o subir a un autobús. Xuega a repetir los detalles d'una viñeta'n otres, y xuega a alcontrar les hestories que hai detrás de caún de los emigrantes que apaecen. Pero con qué dibuxos... Hai que ver cómo dibuxa los xestos, les manes, les espresiones de les cares. Dicho con poques pallabres: los seres humanos (porque eso ye lo que somos a la vista, los xestos, los movimientos, les cares).

Les viñetes que pongo equí son de les más sencilles, porque les otres hai que veles nel llibru. Dende les tapes, ye una obra de arte, nun hai dulda.

Gracies, César Álvarez.