Testu n"asturiano Milenta cómics: Pratt, Valenzuela, March

Siguiendo colos cómics que lleí fai poco, tomo nota d'estos:






Fábula en Venecia, de Hugo Pratt. Lleílu en agostu, como dixe. Siempres me gustaron los cómics de Corto Maltés, anque esti faise un poco pesáu de tan esotéricu y místicu y cabalísticu. Xenial el retratu de Venecia, onde nació Pratt. Y los personaxes y los dibuxos, mui bien (amás en color). Nun ye pa mí el meyor llibru de Corto, pero tá bien.
Extramuros, de Santiago Valenzuela. Grandísimu cómic, mui raru. Valenzuela dibuxa perbién, ye impresionante'l usu que fai de les solombres, y los trazos, les cares... Pero más tovía la orixinalidá. Lleí el cuartu tomu d'una serie ensin lleer los anteriores, asina que nun toi mui enteráu, pero veo una mezcla del gran Khan, Shogun, Babilonia, la Edá Media... Un asediu a una ciudá con catapultes, pero subíes enriba tortugues xigantes, y les catapultes d'unos disparen cerilles, y les d'otros... Ducados. Y hai pantalles d'ordenador, y teléfonu, y trenes, pero además les ciudáes tan dientro una habitación... enriba una silla, al pie d'un comodín, vete a saber. Pero too tien xacíu. Hai que lleelo pa entendelo.
Laura, de Guillem March. Ye tamién parte d'una triloxía de la que nun lleí les otres, pero pue lleese separtá. Al cabu, ye la hestoria d'una moza en Palma de Mallorca, a la que dexa un mozu, que tampoco yera del tó el mozu... y tien una amiga... y fai por escaecer esi amor... y tien desámenes... Una hestoria de lo más normal, pero cautívate ya interésate. El dibuxu ye tamién tremendu, la composición, la manera en que delles veces amesta fondos que paecen (quiciabes seyan) semeyes retocáes. Sólo me abultó raro que nel llibru ponga cites de El canto del loco... Pero bueno, la música ye cuestión de gustos.