Testu n"asturiano Hellboy: el merucu venceor

Non ye que esti blog vaiga camudar nun blog de comics (nun sé un ren del tema como pa facelo). Pero de casualidá toi lleendo unos cuantos, y apúntolos equí. Güey apunto lo que me paeció Hellboy - El gusano vencedor (o sea, El merucu venceor), de Mike Mignola (color de Dave Stewart).

Nel prólogu diz Guillermo del Toro delles veces que Mignola ye un xeniu. Home, a mí prestóme el cómic, pero nun diría que Mignola ye un xeniu (ta perclaro que a del Toro gústa-y, porque dirixó la película, que nun vi). Dibuxa bien, tien un estilu, y sacar esos personaxes del maxín tien méritu, nun digo que non. Pero nin dibuxa tan, tan bien, nin inventó coses tan orixinales como pa nomalu xeniu. Eses griesques colos nazis, que muerren y resuciten milenta vegáes, y eses criatures máxiques, y demás, tan bien, ye un buen comic, pero tampoco nun mos toca'l coral. La pallabra "xeniu" hebía que dexala y emplegala con munchu curiáu. Claro que namás lleí un capítulu, esto tamién ye verdá.

Polo demás, tenemos como dixe unos dibuxos bien fechos (y el color axuda muncho, y nun ye de Mignola), unos personaxes más o menos orixinales (el ráu y la mandrecha de Hellboy son curiosos), unos endriagos bien feos, y ta entretenío. Pero anque el dibuxu tea bien, yo delles veces confundía los personaxes; hebía que andar sacándolos pol contestu. Sorprendióme que a un personaxe-y pusiera bigote, según diz nos bocetos del final, pa que se pudiera estremar d'otru; porque esti mismu ye idénticu a dalgún otru que sal. Podía dexalu ensin bigote, ya puestos.

Tamién hay que decir que el merucu venceor (cosa que sal de un poema de Poe) nun ye un merucu, ye una gata, porque paeció-y que los merucos yeren poco interesantes pa dibuxar (les gates tienen pates, y dan más xuegu).

Total, que tá bien, que ye una creación curiosa, orixinal, con un estilu. Que nun ye poco.