Los músicos sobren

Ayeri a eso de les seis diba yo pa Uría, subiendo por dientro Salesas. Y según salgo pa la cai Nueve de Mayu, siento música clásica. Pero non de esa que sal por un altavoz, non. Yera un sonidu bien estremáu, como si te puxara, como si tuviera cuerpu. Y teníalu. Tenía cinco cuerpos, porque hebía un quintetu cuerda tocando na cai, unos mozos na cera enfrente. All lláu de Stradivarius, ¿casualmente? Dellos vigulines, un violonchelu, y paecióme que una viola. Ye difícil desplicar cuála ye la diferencia ente oyir un discu y oyir a un quintetu de cuerda tocando de verdá... Pero ye tremenda, la vida que tien el son que sal d'un instrumentu de cuerda restregá, que paez un milagru. Estos teníen pinta d'alumnos de conservatoriu o daqué paecío, faciendo por prauticar y de pasu sacar unes perruques, supongo. Sonaba a gloria. Averéme y eché-yos dos euros, que ye lo que llevaba suelto, y tuve a un lláu escuchando un puquitín (y eso que diba con priesa).

Al poco, aportó un coche. Ún de estos trastos escomanáos que circulen agora poles carreteres; una triba de todoterrenu, pero de la casa Audi, asina que brillaba como si nun fora un todoterrenu y gastaba de xuru más que un todoterrenu. Aparcó na parte de la cera, a manzorga de los músicos. Camenté que taba meyor diendo a un aparcamientu envede molestar ellí, a los peatones y a los músicos. Pero ellos siguieron tocando. Ya yera un cuartetu, porque n'acabando la pieza, ún de los chavales marchó. Los sos collacios entamaron otra (nun sé si yera de Mozart o de Vivaldi, pero yera perconocía).

Nesto que pasen dos motos de la policía municipal. Y la segunda moto párase delantre los músicos, y diz-yos daqué. Ún d'ellos para de tocar el vigulín pa oyir al guardia, que me paez que yera una guardia, y asina van parando, poco a poco, los otros, hasta que el violonchelu dio la cabera nota y paró el milagru. Nun sé qué falaron, pero la señora policía tiró p'alantre y los músicos entamaron a recoyer los instrumentos.

La señora axente de la llei nun echó nin una mirada siquiera al Audi que taba aparcáu na cera estorbando el pasu de tol mundu. El coche nun estorbaba. Los músicos sí. Más arriba taba esi paisanu que ta siempres en Doctor Casal tocando la guitarra, delles veces echando un canciu, siempre con un par de perrucos al lláu.

Nun sé si el músicu (aficionáu y profesional a la vez) de Doctor Casal tien llicencia pa tar ellí. Y nun sé si el dueñu del Audi pue aparcar onde y salga de los coyones. Pero paez que aquel quintetu de cuerda, de esos que hebía que pagar por oyir, nun podía tar ellí. Estorbaben. Ya lo decía la SGAE, que tolo que nun seya facer riques a les discográfiques ye matar la música. ¿Qué creeríen estos? ¿Que podíen ponese a tocar seliquino, instrumentos acústicos, música clásica, de compositores muertos que ya nun cobren drechos d'autor? No, home, non. Nesta ciudá semos decentes. Nesta ciudá la música ponla "El topu fartón" en San Mateo, y Melendi, y El canto del loco, y los audis y les motos y los altavoces en navidá, y la Pantoja, y les pantalles eses de la Escandalera cuandu tamos por dar un premiu Príncipe d'Asturies de les artes y ponemos vídeos de otros premiáos nuna cinta ensin fin. Vivaldi gratis delantre Salesas nun pué ser.

Gracies, señores policías. Protexer ya servir.