Xugando con WordPress

Güey tuve probando un poco WordPress, pa ver si me convenía camudar el blog p'allá. Paecióme que quiciabes diba poder andar meyor coles llingües, emplegando categoríes y tal.

Asina que istalé WordPress y probélo. Tuve faciendo por adaptar un tema pa facer lo que yo quería: que la interfaz se viera n'asturiano, y que salieren les banderuques en ca testu y ca títulu según la llingüa na que tuviera escrito. Pa eso quería emplegar les categoríes (una pa ca llingua).

Nun algamé a facer funcionar lo de les banderuques. Yera mui fácil, pero yo tenía'l envís de que tolo que ficiera tuviera nel tema, ensin modificar los demás fontes de WordPress. Y col tema, lo de les banderuques nun ta tan fácil.

Lo demás nun diba mal del todo. En un ratu salíame too n'asturiano comu quería. Lluéu fice una importación de Blogger, pa traer los testos, y funcionó aparentemente bien él solu (¡quedé plasmáu de lo bien que diba too!). Pero cuandu vi que lo de les banderuques nun rulaba, y más que ná que de toes maneres nun diba poder subir el mi tema a WordPress (sólo pues usar los que te dexen ellos) paecióme que nun me merecía la pena camudar de sitiu pa eso.

Nestes que vuelvo a Blogspot, y atópome dos coses percurioses. La primera, que nun se ven los mis mensaxes; vese una páxina que diz que'l mi blog ta temporalmente paráu, y que ya puestos que mire una ferramienta mui buena (WordPress, claro). Los muy cabrones camudáronme la plantilla de Blogger y pusieron una que ponía eso. Menos mal que yo guardara una copia de la mi plantilla, y volví a ponela.

Y otra cosa que tampoco me fizo gracia: que los mis testos yeren, toos, un solu párrafu. Fai poco propúseme escribir dalgún testu asina, pero otra cosa ye que me lo faigan a la fuerza colos que ya escribí. Dempués de miralo, hai una opción pa que los fines de llínia camuden en <br/>, y el WordPress pa facer la importación camuda temporalmente les opciones (eso avísentelo, la verdá), y pémeque al volver a ponelo bien, tienen un fallu y nun dexan bien esa opción. En arreglándola yo, tornaron a vese bien los testos.

Conclusión: los de WordPress son un pocoñín cachondos, nun me fai gracia, y mucho tema y mucha plantilla pero si quies tener el blog con ellos (envede instalalo tú nun servidor tuyu) namás pues usar les que t'ufierten. Asina que... de momentu quédome onde toi.