Frases y otres coses memorables

Pémeque en 2007 fue cuandu vi cantar a Rosa, nuna audición d'alumnos de Marco. Quedamos ablucáos de que esa fora una "alumna", y encantónos la so voz. Pensé que si yera alumna, nun diba prestar ni ná tocar un día dalgo con ella...

Tiempu dempués torné a coincidir, ente otres veces en Jazznera 2008, y conocila un poco más. Falando con ella, supe que yera cantante d'orquesta (y tantes otres coses), y que lo que-y prestaba abondo yera el jazz, y que ya-y gustaría cantar dalgo d'esto, pero que claro, nun tenía tiempu... Yo siempre-y decía que por eso nun hebía problema, que pa facer música bastaba con la so voz y una guitarra :-) Que podían facese canciones perguapes asina, ensin más. Y que yera difícil quedar un grupu, buscar sitiu... pero asina yera perfácil quedar, namás dos persones, la guitarra ye portátil, pue tocase en casa, a saltu mata, cuando cuadre... Que cuando ella quixera, yo diba p'allá y acompañábala, bien o mal.

Pasaron años, y de xemes en cuandu golvíamos a falar de esto. Y un día probamos, y otru día golvimos y ficimos otra canción, y fuimos diciendo "Mira qué guapa sería esta, ¿podremos con ella?".

Y a lo tonto, el sábadu pasáu, rodeáos d'amigos, largamos quince canciones (al final dieciocho) de les que más nos gusten. Y la cosa salió perbién, a la xente gustó-y, pero aparte d'eso, pémeque los dos cumplimos una vieya ilusión, como se suel decir.

Aparte d'eso, pude alcontrame cola profesora de cantu de Rosa, y dixo una frase d'eses que me faen gracia. Falando d'esto de perdese en direutu, de pasar apuros:

Como decía aquel del coru, "...y nun pasa ná; si mos perdemos, encontrámonos nel calderón".

Un calderón ye un signu musical que puestu enriba una nota indica que tien una duración "indetermináa", un sitiu d'esos onde el intérprete para "un ratu", lo que-y paeza. Así que ye un buen sitiu d'encuentru pa esperar a los que quedaron atrás, hasta que lleguen XD

Bueno, pues eso. Foi un día inolvidable.