Testu n"asturiano Retrocesu

Veíase venir.

El otru día, el 21 de xunetu de 2011, foi'l caberu vuelu de los transbordaores espaciales de los Estaos Xuníos. Cuandu tornó el Atlantis de la misión STS-135, cerróse el programa de transbordaores espaciales. El Atlantis foi pa un museu, y nun diba haber más vuelos de transbordaores.

Pero eso nun yera namás el fin de los transbordaores; al cerrase esi programa, la NASA quedó ensin alternativa dala pa facer vuelos tripuláos. Nesti momentu, la NASA nun tien nenguna manera de mandar un home al espaciu. Cenciellamente, decidióse que pa los vuelos tripuláos mercaríase un billete a los rusos, nos sos cohetes Soyuz.

Los rusos, en principiu, taríen encantaos de vender esos billetes por una millonada. Pero ¿qué diba pasar si, polo que fuera, nun podíen o nun queríen mandar cohetes al espaciu? Pues... a saber. Los americanos dependen de los rusos, y puntu. Quién diba decilo durante la guerra fría.

El 25 d'agostu pasáu, una nave de carga rusa Progress M-12M, non tripuláa, estrellóse'n Siberia porque falló la tercera estaya del cohete que hebía ponela'n órbita. Les Progress lláncense'n cohetes Soyuz.

Poro, los rusos suspendieron tolos llanzamientos de cohetes Soyuz hasta que se sepa qué falló nesti. Eso quier decir que agora mesmo nun hai prevista manera dala de mandar persones a la Estación Espacial Internacional. Otros países puen unviar naves de carga, pero los vuelos tripuláos dependen de les Soyuz.

Les naves ruses yeren fiables y barates hasta agora. Pero esti últimu añu ya van dellos accidentes y satélites perdíos polos rusos, y agora tocó-y tamién a les Soyuz.

Fai más de mediu sieglu los soviéticos taben poniendo naves na Lluna, y los americanos punxeron xente fai más de 40 años. Ye notable que agora la humanidá tea afogáa pa mandar xente a una órbita cercana.

¿Qué esplicación hai pa esto?

No hay comentarios: