Superación

El llunes lleó'l proyeutu fin de carrera d'inxeniería téunica informática una moza. Fizo un bon trabayu; non perfechu, pero bonu. Y como fizo un bon trabayu, non tuvo problema dalu col tribunal.

Bueno, dalgún problema sí tuvo: ye sorda.

Cuandu lleo, sobre too nos comentarios a noticies en La Nueva España, a la xente quexándose de lo difícil que ye la carrera, de que la culpa de que suspendan ye de los profesores, de que pa facer esa inxeniería de tres años hai que echar siete, de que'l trabayu tá permal, non porque nun tengan, sinon porque nun-yos paguen los sudores que-ys costó... Nun sé si reíme o llorar.

Alcuérdome de esti mensaxe que mandó, un día, el mi maestru de guitarra:

QUERIDOS ALUMNOS

Hola, queridos alumnos. Ver por favor este video y luego me contáis que fue de aquello de:
es que yo tengo la mano muy pequeña
es que no soy capaz de tocar con esta guitarra
es que yo con las cuerdas tan gordas...
es que yo de pequeño me caí de la moto y mira como tengo el dedo!
¿tendré los dedos demasiado gordos?
tocar esto es imposible!!
es que, es que... jajaja

Y alcuérdome, tamién, delles veces del gran Django Reinhardt, que na mano izquierda tenía útiles la mitá de los deos, como se ve nesti vídeu, y que los perdió nun incendiu cuandu ya sabía tocar la guitarra... y tuvo que, poco menos, volver a entamar:



Y alcuérdome d'Horace Parlan, un pianista que vi un día, y fixéme que la mano drecha teníala rara, como tiesa. Y entós enteréme de que tuvo polio de pequeñu. Pero lo que sedría la muerte pa cualquier pianista, pa Parlan non foi más que'l desendolcu d'una téunica propia cola manzorga. Y no ye que tocara el pianu; ye que vive del pianu, y del pianu jazz. Y non toca con cualquiera, sinon con xente como Benny Carter.

Y podíemos falar de tolos pianistas ciegos (Montoliu, Art Tatum) y equí ya se faló de Michel Petrucciani.

Y podíemos falar del baterista de Def Leppard, Rick Allen, que ye... mancu. Non; que quedó mancu dempués de ser baterista de Def Leppard, y que hebo aprender todo ya inventalo, porque como diz él, "nun pues consultar el manual pa bateristas mancos".

Los músicos famosos son xente escoyía, pero en sobreponese a les coses nun son diferentes de tanta otra xente. Mancu o non, pocos puen tocar la batería en Def Leppard, como Rick Allen; pero creemos que lo importante d'esta xente ye eso, y non ye asina. Lo importante ye que son xente del montón. Como nosotros.

La moza que terminó la carrera el llunes ye una moza de tantes, con tolos defeutos y virtúes. Fizo los mesmos desámenes que'l restu, fizo una presentación oral como el restu... Toi perarguyosu de tolos alumnos que lleen el proyeutu conmigo, y toilo d'ella. Y faime pensar.

Y non, non ye que haiga que plantegase ser un pianista famosu de jazz. Non tienes que superar les dificultáes o el destín d'ellos; tienes que superar les tuyes. Ellos nun ficieron más que eso. Si dalgo tienen de especial, ye eso. Eso que tenemos toos, que toos podemos algamar si nos lo proponemos.

Felicidáes, moza.