Funcionarios y xente probe

Falando de esto de los sueldos de los diputáos, y de los privilexos que supuestamente tienen.

Lo primero que voi decir ye que yo nun tengo ñidio lo que hai que facer. Lo que sí veo ñidio ye que dalgunos dicen lo que dicen porque se dediquen a facer comedia, porque toman a los ciudadanos por tontos, no cual nun-yos falta razón. Dícenlo en grande y sacando pechu, na prensa; pero non gurgutaron onde, más que decilo, podíen facelo, que ye... nos muérganos de la cámara correspondiente.

Lo segundo ye que yo nun toi tan xuru de que haiga tantos privilexos nin de que un políticu heba cobrar el salariu mínimu. Non. Non me paez mal que daquién con tala responsabilidá, con tales obligaciones y xeres, tea bien pagáu. Y de lo que gana un políticu, la parte que menos me pruye y me quita el sueñu ye el sueldu o la pensión, les cifres públiques establecíes por llei. Anque fora el triple de lo que ye.

Pero dicho eso, y anque teamos cásique d'alcuerdu nesti tema, nun me gusten les pallabres que equí-y atribuyen a Duran i Lleida. Atribución que, nesti casu, ye correuta, porque diz lo mismo, coles mismes pallabres, nel so blog.

Señor Duran: vamos dexar de lláu la so definición de "xente preparada", que daría pa un llibru.

Pa entamar, nun veo que tenga rellación el tar preparau o bien pagau con nun querer desplicar el patrimoniu a tol mundu. Y tampoco veo yo que seya problema dalu el que haiga "xente probe" nel Congresu. Hebía haber bastante más.

Lo que quiero nel congresu, señor Duran, son persones que piensen que sí, que ser diputáu ye dar la vida polos demás, non un oficiu. Que ser diputáu ye perder perres, pero que les perres son lo de menos. Que ser diputáu implica, sí, desnudase delantre tol mundu, decir a los cuatro vientos los bienes y los intereses d'ún. Que ser diputáu ye un actu voluntariu de renuncia a una serie de drechos, pol bien común, pola transparencia. Que ser diputau ye dir en manga corta, incluso cuando fai frío, pa que se vea que ún nun lleva ases escondíos. Oxalá ser diputáu fora nun tener mieu a los micrófonos abiertos; oxalá fora llevar un micrófonu abiertu, emitiendo por Internet, na solapa.

Usté piensa que los diputáos son xente que sopesa lo que gana nun sitiu y nel otru, y que hai que da-yos un caramelu golosu pa que non sufran tanta perda. Y yo nun quiero esos diputáos nel mi Parlamentu. Que se queden nel bufete o na empresa.

Señor Durán, ye verdá que hai muncha xente que se fai funcionaria o probe porque nun val pa otra cosa. Pero, por si nun lo sabe, hai montones de xente que ta onde tá porque tien vocación de servir a los demás, anque-y cueste perres, disgustos, o la vida, lliteralmente (que ye abondo más de lo que pierde un diputáu). Dese usté una vuelta pola policía, poles universidáes, por Médicos Sin Fronteras, pol exércitu, por cualquier sala de conciertos, por tantos y tantos sitios.

Y ellí, patrullando, dando clases, axudando a enfermos, o tocando el vigulín, atopará una montonera de xente preparáa, muncho más que el diputáu mediu, y que nun tan ellí porque nun puean ganase la vida notra cosa, y que tampoco tienen estabilidá llaboral.

Tan ellí porque nacieron pa eso, y quieren facelo, por enrriba de too.

Son asina de tontos, señor Duran. Nun tan ehí poles perres, nin pola seguridá. Van ehí a llevar hosties. Y son felices, y faen el so trabayu lo meyor que pueden. Porque la salú de la xente, o la felicidá del públicu, son lo primero.

Esa xente tamién ye la más difícil de corromper.

Y esos son los diputáos que yo quiero nel congresu.