El Premiu Nobel a la metáfora

Toi lleendo delles coses sobre mecánica cuántica. Y, claro, ye perdifícil imaxinase el mundu cuánticu, visualizar cómo funciona. Ver un fotón, que ye onda y corpúsculu al mesmu tiempu. Dellos autores dicen que cuando ún estudia coses tan llonxanes de la nuestra esperiencia y la nuestra realidá, igual lo que hai que facer ye dexar de lláu la intuición, nun intentar visualizar ná, y usar les matemátiques, porque de toes maneres nun tamos preparaos pa entendelo (la nuestra vida desendólcase nun nivel macroscópicu, non cuánticu).

Per otru lláu, toles teoríes científices, y ente elles la mecánica cuántica (o la relatividá, o cualquier otra) son una ellaboración mental; nun son la realidá, namás la despliquen. Dán-y una forma que podamos entender (con munchu trabayu). Una teoría ye buena si desplica tolos fenómenos.

Digo yo: si daquién, nun llibru de testu, construye una metáfora, una imaxen de una teoría, que la xente pueda entender... ¿Nun ta faciendo el mesmu trabayu que'l científicu que construye la teoría?

La teoría acomoda los fenómenos físicos a una abstracción, y la metáfora acomoda los términos de la abstracción a una imaxe que la xente pue entender.

Si un divulgaor atopa una simplificación tan bona que puean encaxar nella tolos aspectos importantes de la teoría... ¿Nun ta faciendo dalgo tan valioso como una teoría? Ye una teoría de segundu nivel, de segundu ordre. Ta acercando el fenómenu al maxín humanu. Lo mesmo que el científicu (pero pa un públicu diferente). Toi cansáu de imaxiname el átomu como un sistema solar, "pero non ye asina, eso namás que val pa dellos aspeutos"; o al ellectrón como una bola, "pero non ye asina", o como una onda, "pero non ye asina", y así too lo demás. Ye asina, pero namás pa esto y esto.

Si daquién atopa una metáfora, una desplicación, que mos puea axudar a ver el espaciutiempu, o espacios de más dimensiones, o la dualidá onda-corpúsculu... Nun digo poner un exemplu parcial, sinon atopar una metáfora completa, consistente, que de verdá mos permita razonar sobre eses idegues y entendeles, creo que hebía que da-yos premios Nobel. Que tenía que haber un premiu Nobel a la metáfora.

Y, además, pémeque (anque nun pueo demostralo) si ún atopa una metáfora d'esa triba, taría mui cerca d'atopar tamién teoríes unificadores. Que la ciencia diba beneficiase de la metáfora tanto como la metáfora se alimenta de la ciencia.