Cómo facer panorámiques / cómo hacer panorámicas (I)

[Este artículo describe cómo hacer una foto panorámica ensamblando varias fotos simples, todo ello con software gratuito y una cámara normal y corriente. Si algún lector no entiende el asturiano y quiere que lo traduzca, puede decirlo en los comentarios y lo haré gustosamente.]

Va tiempu que me apetez facer panorámiques de dalgunes vistes cuandu voi de viaxe, y lluéu pa coses de trabayu tuve que pescanciar cómo facer panorámiques de 360º pa facer "visites virtuales". Y dempués de rabilar, voi cuntar equí cómo pue facese tal cosa, too con software llibre o que, polo menos de momentu, ye gratis, y con una cámara corriente y moliente. Ye mui fácil.

Nesti apartáu voi apuntar cómo facer una vista panorámica, ensin más. Nun tien munchu misteriu, si ún tien un programa fácil d'usar.

Lo primero, claro, ye facer les semeyes que lluéu vamos amestar pa componer la panorámica. Basta ponese nel sitiu, y entamar a disparar de drecha a manzorga (o al revés, como ún quiera), faciendo por caltener la cámara siempres a la mesma altura. Equí va un exemplu, cuatro vistes dende la ciudá siciliana d'Enna (que nun ye mal sitiu pa sacar panorámiques) tomáes dende un mirador, disparando de manzorga a drecha.



Ye necesario repetir una parte de la semeya en ca una, pa que al pegales el ordenaor sepa reconoceles. Yo creyía que nun hebía que repetir demasiáo pa nun confundilu, pero resulta que nun ye asina, y pa que salgan bien les panorámiques, hai que procurar repetir como un 40% de la semeya en ca pasu. Vamos, que lo que nuna semeya ta nel centru, na siguiente semeya póneslo a manzorga, y asina la siguiente...

Hai que tener en cuenta delles coses. Si hai muncha diferencia de lluz ente una semeya y otra (nesti exemplu nótase muncho), nel resultáu final puen notase "gradientes", pero bueno, eso depende de la situación y de si yes buen fotógrafu; si dispares n'automático, como faigo yo, va pasate casi de xuru (ún tamién pue garrar el Gimp y correxir les semeyes si ye mañosu). Otra cosa ye que si vamos amestar les semeyes, y nuna ta una persona, y esta persona foi caminando y tamién sal na siguiente semeya, va quedar raro... O si hay un coche, por exemplu, que ta nuna semeya, y na siguiente sal el mismu sitiu pero ensin el coche, al amestar les semeyes pue ser que el programa saque mediu coche... Vamos, que hai que intentar facer les semeyes "compatibles". Esto ye cosa de fixase un pocoñín y tener paciencia. Si sacamos semeyes del mar, acordái-vos de que les oles tan moviéndose tol ratu (y coles nubes tamién pue pasar)... Si se puen sacar xuntes nuna sola semeya, meyor. Si non... hai que ser rápidu pa que nun se note muncho la diferencia.

Entós vien la xera de xuntar les semeyes, lo que llamen perehí stitching. Hay dellos programas: PanoTools, Hugin, y otros. Yo prebélos, pero hai delles coses que nun entiendo (nun sé muncho de fotografía), y el más fácil d'usar, y el que meyor resultáu me dio y menos complicaciones, ye... un programa de Microsoft Research: Microsoft Image Composite Editor, o ICE. De momentu, ye gratis, pero funciona perbién. Si dexa de ser gratis, el Hugin tampoco me funcionó mal.

¿Qué hai que facer? Pues abres el programa, y ves dalgo asina (calca la imaxen si quies vela más grande):



Y entós nun tienes namás que seleicionar tolos ficheros de les semeyes que quies amestar, arrastralos y azotalos nel programa (tamién pues abrilos con File/Open, y tal). Pondráse a pensar (pue llevá-y un ratu llargu), y entós amosaráte esto:



Ye normal que haiga deformaciones nos bordes, por coses d'óptica y porque cuandu facemos les semeyes nun caltenemos la cámara siempres nel mesmu sitiu (amigo, si non, nun fadríen falta les cámares panorámiques nin los fotógrafos), y por eso los bordes nun son rectos (si faes les semeyes con un trípode, la cosa pue quedar meyor). Ná, agora escueyes el formatu que quiés nel apartáu Export, y lluéu calques el botón Export... y ya tienes el ficheru.

Si quies quitá-y los bordes turcios a la imaxen, enantes d'esportala pues mover los gabitos del recuadrín que tien alrodiu, o bien calcar en "Automatic crop" pa que lo faiga él solu, y ya ta. Yo de cutio nun lo faigo, nun me dan más los bordes pretos. Y esta ye la vista dende Enna:



Perfácil. Lluéu voi escribir cómo se pue facer una panorámica entera, y cómo se pué publicar nuna páxina web pa que el que la ve puea rabilar y mirar alrodiu.