Democracia y Chávez

Un día de la selmana pasada, un amigu (sí, ye amigu, y de los buenos) llamóme por teléfonu y díxome: "¡Ya sé por qué nun me gusta la democracia!" Enantes de que siguiera, díxe-y: "No, si a mí tampoco nun me gusta. Lo que pasa ye que lo que nun ye democracia gústame menos tovía." (Por si daquién tien curiosidá, el so refugu a la democracia básase en que "nun hai nada más inxusto que tratar igual a los que son diferentes". Sí, ye amigu míu, ¿qué pasa? Anque nun razone bien, anque use cites gastáes.)

Pémeque ya dixe dalguna vegada que nun soporto a Chávez. Pa mí encarna lo peor de la democracia, la demagoxia más faltosa y burra. Y toi contentu porque perdió'l referéndum pa camudar la Constitución de Venezuela. Toi contentu porque paráron-y los pies. Ensin sangre, ensin mentires. Col votu.

Y hai que almitir una cosa. Si llega ganar el "sí", díbamos tar diciendo (yo el primeru) que menudu pucherazu. Pero ganó'l "no"... y díxolo y almitiólo. Neso, hai que decilo bien claro, foi demócrata. Dalguna lleición podemos sacar. Paez mentira que tanta xente'n España siga desllexitimando'l resultáu claru d'unes elleiciones y Chávez, del que yo esperaba cualaquier cosa, lu aceute.

El casu ye que coses como esta namás que pasen nuna democracia. Y por eso, amigu anónimu, a mí nun ye que me guste, pero doi-me cuenta de que ye daqué grande cuandu la dexen funcionar.

Namás espero que haiga poca xente que piense como tú.