Aparentar tien más lletres que ser

Tengo rocea, en xeneral, a xulgar o criticar a naide pol so aspeutu. Sé que nun ye obligación de naide gustar a tol mundu. Y lo de la facha de caún y lo buena o mala que seya ye, de cutio, namás que cosa de gustos. Pero voy escribir del aspeutu, por dos motivos. Ún, porque magar ye cosa personal ya arbitraria, equí delles veces escribo coses personales ya arbitraries y de los mis gustos. Y dos, porque en dalgún casu nun escribo del aspeutu, sinon de la hipocresía.

Una cosa que nunca nun entendí ye por qué un modistu ye buenu cuandu fai ropa percara, y que nun-y sienta bien a cuasi naide. Pa mí, el meyor sastre ye el que ye quién pa vestime y dexame guapu, manque tenga barriga o les pates curties. Por eso non pescancio por qué les muyeres faen tantu casu a revistes como Vogue. De pasu, nun entiendo bien por qué les ministres se faen una foto cubiertes de pieles y fatiando con modelos percaros. ¿Paecerá-yos que asina tán más cerca del ciudadanu? ¿Paecerá-yos que por ser muyeres tienen que mercar ropa y salir en Vogue? Si ye asina, ya puen poner cuotes, que flacu favor-y faen al feminismu. Lo que tá claro ye que si te llamen de Vogue nun van sacate de chándal.

Otra muyer que nunca nun entendí ye Carmen Calvo, ex-ministra de cultura. Nun entiendo lo pesáa que se pon la xente cola "moda española". Y nun entiendo, además, por qué tienen siempres eses ganes de garrar lo más chillón, lo más fato, lo más estravagante, lo más llamativo, lo más feo. (Ya dixe que too esto, tá claro, ye el mi gustu namás.) Nun entiendo cómo se pue andar perehí d'estes traces. (Sobre too, na semeya a manzorga.)

Otra que tal baila ye Esperanza Aguirre. A diferencia de Carmen Calvo, que como ministra de cultura nun me gustó enxamás y no-y vi facer namás que tontáes, Aguirre nun me paecía mal de ministra d'educación. Que un ministru quiera que los gua.hes estudien más humanidáes nun sobra. Pero dempués, cuando ya la vi de presidenta de Madrid (pucherazu de por medio), y les coses que dixo y fizo, abrí los güeyos y vi qué clase de persona yera y qué clase de... ideoloxía defiende. Y dame dentera vela facer como que fai deporte, con esos traxes (que nun tienen ná que envidiar a los modelinos de les Vogueministres). ¿Comprarías-y un coche de segunda mano a daquién con esa sorrisa, o que de manera tan descarada fai como que ye lo que nun ye, y se esfuercia tanto por agradar a según quién y facese la foto? Yo, non.


Falando d'Aguirre, dalgún modelín d'ella tamién ye pa echá-y de comer aparte (nun llega al estremu de Calvo, por suerte). Pero vese que tan encantáes de enseñanos el traxe, que nun lu punxeron namás que pa eso, pa llamar la atención, pa facese les simpátiques o les orixinales o les atrevíes. Vese que tan disfrazáes. Y quieren que-yos riamos la gracia. Aparentar tien más lletres que ser.


Y pal final dexo lo peor. Lo del Vogue cenciellamente nun lo entiendo. Lo de Calvo paezme feo con avaricia. Lo de Aguirre paezme hipócrita y falso. Pero lo d'esta xente dame tristeza. Tengo respetu pola figura de Xesucristu, y si lu imaxino viendo esto, alcuérdome siempres de cuandu echó a los mercaeres del templu.


Y equí ta la novia, perguapa:


Agora mesmo nun me apetez falar en serio de lo que representa la Ilesia Católica'n España y de lo que demuestren tolos díes, nin analizar les sos contradiciones. Asina que vamos tomalo a broma. Nun pueo evitar una maldá pequeñuca, que espero que nun moleste a naide porque nun ye la mi intención. Tamos falando de aspeutu, y sé (y dixe) que nun ye importante, pero además si daqué pue resultar ofensivo pa daquién nun ye la broma que vien agora, sinon más bien lo que fizo Cañizares en serio y ta equí enriba (y muncho más otres milenta coses que fizo tamién en serio y que nun voi sacar agora.) Así que humor, por favor. A buscar les siete diferencies: