L'escaparate

Camino pela cai. Al mi lláu pasa un autobús enllenu xente, mirándome en silenciu detrás del cristal, como un escaparate d'esclavos. Ya tá lloñe, pero tien que parar nel semáforu, y yo sigo andando. Algámolos, vuelvo a velos, y pásolos. Pienso na xente de dientro. De xuru que van a trabayar. Dalgunos dirán más cerca que yo, y nun anden porque son vagos. A dellos otros fálta-yos tovía una hora pa aportar al trabayu, y van tornar a casa pola nueche, deslomáos y con ganes de Prozac. Otros van pal mélicu. Anque ellos y yo vamos pal trabayu, ellos son presos desgraciaos y yo non, porque yo toi na cai y soi llibre. Ábrese el semáforu, y algámenme ellos a mí y pásenme otra vegada, mirándome, véo-yos les cares, pero ya nun hai más semáforos nun cachu y agora voi perdelos de vista polo menos hasta mañana. Alcuérdome de los trenes de los campos de concentración, y siéntome como si llevara botes y gorra platu. Por caminar pela cai.