Testu n"asturiano Prostitución

Polo que paez, una comisión del Congresu los Diputaos diz que nun hai que regularizar la prostitución en España.

Nun atopé el testu de verdá, asina que namás sé lo que punxeron los periódicos (¡menuda!). Y además nun conozo muncho la llei polo que cinca la prostitución. Pero aparte de nun ser un espertu, lo que punxeron los periódicos nun acabo de entendelo.

Dicen que regular la prostitución como un trabayu nun tien encaxe xurídicu porque va contra los artículos 9 y 14 de la Constitución.

Paez que del artículu 9 lo que yos abulta problemático ye que:

Corresponde a los poderes públicos promover las condiciones para que la libertad y la igualdad del individuo y de los grupos en que se integra sean reales y efectivas; remover los obstáculos que impidan o dificulten su plenitud y facilitar la participación de todos los ciudadanos en la vida política, económica, cultural y social.


Y el 14 diz:

Los españoles son iguales ante la ley, sin que pueda prevalecer discriminación alguna por razón de nacimiento, raza, sexo, religión, opinión o cualquier otra condición o circunstancia personal o social.


A ver. Nesti país hai muncha, muncha xente que nun ta d'alcuerdu cola primera frase del 9, que ye la que yos preocupa a los de la comisión mixta. ¿Ye igual el obreru que se sube a reteyar que Alicia Koplowitz, que ye la so xefa (non, xefa non, propietaria) mui, mui, mui por enriba d'él? ¿Considérase eso una desigualdá, o non? ¿Debería'l Estáu promover les condiciones pa que Alicia se suba de xemes en cuandu a reteyar (con una funda de Pedro del Hierro y chiruques de Gucci, si quier), o bien pa que dalgunes selmanes al añu el obreru tea nun xardín de La Moraleja comiendo boliquines de Ferrero Rocher?

Dalgunos cuiden de cutio que la prostitución ye un problema de desigualdá. Pero non económica, non. Namás desigualdá de sexos. Pero yo nun termino de velo claro. La prostitución ye la prestación d'un serviciu a cambiu de perres, y puen prestalu muyeres o homes. Ye una actividá económica. Eso sí, ye dura, difícil, pa munches persones repulsiva. Como recoyer basura pa otres. Como operar a corazón abiertu pa otres. Como llimpiar portales pa otres. Como vacunar a neninos afamiáos y sarnosos n'África pa otres. Como reteyar, o desatascar pozos negros, o curar vaques, o cuchar praos. ¿Ónde ta la desigualdá nestes xeres? Y si la hai (que la hai), ¿nun habrá que impediles tamién?

¿Nun pueden les muyeres contratar prostitución si yos peta? Otra cosa ye que lo faigan muncho o poco, pero eso son namás leyes de oferta y demanda, ¿non?

O ¿ye que nun tenemos drechu a quitá-y a un paisanu de martillar una piedra, anque puea achaplase una mano, porque pa eso la mano ye d'elli, y achaplase la mano ennoblez, pero tenemos el drechu y el deber de quitá-y a una muyer -o a un paisanu- de ganase la vida con cualquier otra parte del cuerpu?

Y puestos a lluchar cola desigualdá, ¿nun serán desiguales les putes que nun pueden trabayar en condiciones de presona y non de ganáu? ¿Llúchase meyor cola desigualdá dexándoles escondíes? ¿Nun ye discriminatorio que la so actividá económica nun tea reconocía como les demás? ¿Nun ye discriminatorio que los comités de prevención de riesgos llaborales nun miren pa elles?

¿Qué tien de discriminatorio vender esi serviciu? ¿Ye peor lo que fai una puta que lo que fai Naomi Campbell? ¿Por qué? ¿Porque Campbell cobra más perres? ¿Quién fai más dañu a los sos semeyos?

Nun sé, pero lleendo los artículos 9 y 14 convénzome de que hai que regular la prostitución. Gustaríame que daquién me desplicara cómo ye que, a partir de la misma Constitución, pa la Comisión Mixta la conclusión ye la contraria.

1 comentario:

Esfer dijo...

Sigún dixeron nes noticies ye porque entienden la prostitución como una forma de violencia de xéneru.

Amás paez que quieren siguir educando con leyes y así dicen que baxará la demanda ente los mozos (que al paicer son los que más lo demanden agora...).

Yo ya nun me cuestiono coses como estes... si sólo topen una regla discriminatoria en les bases de "Miss España", ¿qué podemos esperanos?