Presunción d'inocencia

Qué manía la mía de pensar. Cuandu vi que deteníen al alcalde de Alhaurín el Grande (quier dicise, grande Alhaurín, non l'alcalde) na televisión y toa la xente que taba ellí delantre, mui, mui gafa, al borde la llocura, gritando, púnxeme (otra vez, sí...) a pensar. Pensaba yo si toa esta xente que gritaba la so inocencia tien información que los emburrie a ponese ellí a poner la mano nel fuéu. ¿Conoceránlu? ¿Sabrán qué papeles hebía o nun hebía nel ayuntamientu? Si agora mesmo me dixeran a mí que'l alcalde d'Uviéu, o de Mieres, o sin dir tan allá, que'l presidente de la mi comunidá de vecinos estafó a daquién... ¿atreveríame yo a decir que non, que nun pué ser? Nun se pué negar que esti yera un alcalde mui, mui cercanu, si tanta xente sabe de buena tinta que ye honráu. Debía de dexalos mirar penriba'l so costín mentantu trabayaba.

Pero hai una cosa mui positiva: la presunción d'inocencia. Facía munchu tiempu que, por motivos partidistas, la xente nun daba por fecho que daquién yera inocente hasta que se demostrara lo contrario. Y ye una norma básica del nuestru ordenamientu xurídicu. Asina que, por esi llau, toi percontentu.

Yo, de principiu, fice'l esfuerciu de facer como ellos y dar tamién al alcalde por inocente, que ye lo correcto.

Pero entós oyílu falar a elli.

Esi mismu día dixo: "¡Nun van a por mí, van a pol PP!". Y entós cayí de la burra. ¿Pue ser que lo que punxo ellí a toa esa xente nun fuera la presunción d'inocencia, sinon el partíu del que yera l'acusáu?

"Nun van a por mí, van a pol PP". Pues compañeru, a quien llevaba deteníu la policía nun yera al PP, yera a ti. Y nos escritos de acusación toi seguru de que nun acusa naide al PP, sinon a un tal Juan Martín Serón, que vienes a ser tú. Y nun sé si sabes que nesti país, polo poco qué sé de drechu, les organizaciones nun tienen responsabilidaes penales (cola esceición de la "izquierda abertzale", colos problemas xurídicos que ello ta creando), sinon namás les presones. Y que pa acusar a una presona, y dempués pa condenala, podrá facese por erru, pero un erru que nun ye tan fácil de cometer: hai que presentar prebes de cargu.

Y dempués oyílu decir que "esta es la república bananera que Zapatero quiere instaurar, las personas honradas en la cárcel y ETA en la calle". Y dempués, en plan arenga, que "se puede ir contra un alcalde, se puede ir contra un concejal, se puede ir contra un partido, pero contra un pueblo no se puede ir" Y según los periódicos (esto nun lo vi yo) dixo que "España necesita una revolución". Polo visto, el probe cree que ye Zapatero el que lu acusa de prevaricación y cohecho (en los ratos que-y dexa llibres la conspiración pa vende-yos España por parceles a los sos amigos terroristas y preparar la República -bananera-).

Esti señor tenía la mi presunción d'inocencia. Pero agora ya non. Agora pémeque ye, probablemente, culpable, y no polo que diz la xueza nin polo que dicen los periódicos, sinon polo que dixo él. Lo primero, porque si eses babayáes que diz son tola so defensa, güelme mal la cosa. Y lo segundo, porque acabo de ver a un alcalde usando del so cargu y del so pueblu de manera indigna, emburriándolu contra les instituciones democrátiques que-y dan de comer y-y garanticen una defensa y un procesu xustu, insultando al Presidente del Gobiernu, y pisando los principios a los que xuró lealtá col so cargu.

Ya ye culpable de munches más coses, y muncho más graves, que eses de les que lu acusen, y cometióles delantre les mis narices. Un suxetu d'esta catadura moral nun pue ser alcalde de sitiu dalu.