Testu n"asturiano Presunción d'inocencia

Qué manía la mía de pensar. Cuandu vi que deteníen al alcalde de Alhaurín el Grande (quier dicise, grande Alhaurín, non l'alcalde) na televisión y toa la xente que taba ellí delantre, mui, mui gafa, al borde la llocura, gritando, púnxeme (otra vez, sí...) a pensar. Pensaba yo si toa esta xente que gritaba la so inocencia tien información que los emburrie a ponese ellí a poner la mano nel fuéu. ¿Conoceránlu? ¿Sabrán qué papeles hebía o nun hebía nel ayuntamientu? Si agora mesmo me dixeran a mí que'l alcalde d'Uviéu, o de Mieres, o sin dir tan allá, que'l presidente de la mi comunidá de vecinos estafó a daquién... ¿atreveríame yo a decir que non, que nun pué ser? Nun se pué negar que esti yera un alcalde mui, mui cercanu, si tanta xente sabe de buena tinta que ye honráu. Debía de dexalos mirar penriba'l so costín mentantu trabayaba.

Pero hai una cosa mui positiva: la presunción d'inocencia. Facía munchu tiempu que, por motivos partidistas, la xente nun daba por fecho que daquién yera inocente hasta que se demostrara lo contrario. Y ye una norma básica del nuestru ordenamientu xurídicu. Asina que, por esi llau, toi percontentu.

Yo, de principiu, fice'l esfuerciu de facer como ellos y dar tamién al alcalde por inocente, que ye lo correcto.

Pero entós oyílu falar a elli.

Esi mismu día dixo: "¡Nun van a por mí, van a pol PP!". Y entós cayí de la burra. ¿Pue ser que lo que punxo ellí a toa esa xente nun fuera la presunción d'inocencia, sinon el partíu del que yera l'acusáu?

"Nun van a por mí, van a pol PP". Pues compañeru, a quien llevaba deteníu la policía nun yera al PP, yera a ti. Y nos escritos de acusación toi seguru de que nun acusa naide al PP, sinon a un tal Juan Martín Serón, que vienes a ser tú. Y nun sé si sabes que nesti país, polo poco qué sé de drechu, les organizaciones nun tienen responsabilidaes penales (cola esceición de la "izquierda abertzale", colos problemas xurídicos que ello ta creando), sinon namás les presones. Y que pa acusar a una presona, y dempués pa condenala, podrá facese por erru, pero un erru que nun ye tan fácil de cometer: hai que presentar prebes de cargu.

Y dempués oyílu decir que "esta es la república bananera que Zapatero quiere instaurar, las personas honradas en la cárcel y ETA en la calle". Y dempués, en plan arenga, que "se puede ir contra un alcalde, se puede ir contra un concejal, se puede ir contra un partido, pero contra un pueblo no se puede ir" Y según los periódicos (esto nun lo vi yo) dixo que "España necesita una revolución". Polo visto, el probe cree que ye Zapatero el que lu acusa de prevaricación y cohecho (en los ratos que-y dexa llibres la conspiración pa vende-yos España por parceles a los sos amigos terroristas y preparar la República -bananera-).

Esti señor tenía la mi presunción d'inocencia. Pero agora ya non. Agora pémeque ye, probablemente, culpable, y no polo que diz la xueza nin polo que dicen los periódicos, sinon polo que dixo él. Lo primero, porque si eses babayáes que diz son tola so defensa, güelme mal la cosa. Y lo segundo, porque acabo de ver a un alcalde usando del so cargu y del so pueblu de manera indigna, emburriándolu contra les instituciones democrátiques que-y dan de comer y-y garanticen una defensa y un procesu xustu, insultando al Presidente del Gobiernu, y pisando los principios a los que xuró lealtá col so cargu.

Ya ye culpable de munches más coses, y muncho más graves, que eses de les que lu acusen, y cometióles delantre les mis narices. Un suxetu d'esta catadura moral nun pue ser alcalde de sitiu dalu.

3 comentarios:

Anónimo dijo...

¿Nun te paez percurioso que xusto agora, a cuatro díes namás de les ellecciones, tolos fiscales. ¡¡¡todos!!!, pidan l'archivu de toles causes nes que tan implicaos dirixentes socialistes? ¿Y nun te paez curioso que esos mesmos fiscales -la fiiscalía ye única n'España- impulsen les causes nes que tan implicaos dirixentes del PP? ¿De verdá creyes que la fiscalía, el ministeriu público, ye'l representante del pueblu nos xuicios? ¿Nun te paez más bien que la fiscalía ye en realidá el representante nos xuicios del partíu que caltien el gobiernu? Puedo ponete milenta exemplos de causes clarísimes archivaes, y de braeres persecuciones que surden cuando s'acerquen les eleeciones. Solo voi ponete dos casos. Unu: la fiscalía pidió l'archivu d'una causa por presunta prevaricación escontra l'alcaldesa de Llanes, del PSOE, pol derribu, sin informe xurídicu, d'un edificio históricu, catalogáu y protexíu. Y dos: la fiscalía reactiva ahora, depués de dos años d'escaezu, el casu escontra l'alcalde de Ribesella, del PP, por un permisu irregular a la so muyer pa allevantar una casa, que, por ciertu, tenía informes xurídicos y téunicos favoratibles. ¿Nun te paez raro? ¿Nun te paez qu'hay diferentes vares de midir? ¿Yes capaz de ponete un momentín penriba los partíos, de les izquierdes y de les dereches, de lo que ye supuestamente progre y "chachi", y de analizar los fechos como soceden de verdá, al marxe de prexuicios? Polo que escribes y como lo escribes, paezme que sí.

Anónimo dijo...

Hola, Xurde. Gracies polos tos comentarios.

Primero: nun pienso que la xusticia sea perfeuta ni incorrupta; ye, namás, la única que tenemos.

Segundo: Nun sé hasta qué puntu los fiscales tan emburriáos pol gobiernu de turnu (autonómicu, nacional); cuido que daqué d'eso habrá. La división de poderes ye un principiu teóricu (como'l drechu a una vivienda digna) que facemos por llevar a la práctica, con desiguales resultáos... Toos los que tan ehí son presones, y débense favores ente ellos.

Nesi sen, nun te digo que nun tengas razón y daquién tea faciendo la vista gorda pa unos sí y pa otros no, según el vientu que sople. Dígote tovía más: toy seguru de que la mayoría de los casos pasen ensin que naide los vea. Los poderosos son así. Lluchen la so guerra, y si son amigos tápense y si pueden clávense'l puñal. Pero pémeque que pue ser más fácil que se faiga la vista gorda delantre delles prebes, pero non tanto que metan na trena a ún que yera inocente (falo namás d'esti ámbitu de corrupción económica).

Sí toi en desalcuerdu contigo nuna cosa: en que me fales d'izquierdes y dreches y me llames progre nesi sen. ¿Qué "prexuiciu" viste nel mi artículu? Con tol respetu, ye como cuando una feminista airada diz que nosequién dixo daqué sexista, y mirando'l testu vese que lo único sexista foi la interpretación qu'ella fizo; ye lo que se llama "sexismu del oyente". Nesti casu, nomé al PP porque casualmente esti alcalde yera del PP. Gustaríame que'l alcalde esi d'Alhaurín fora socialista, o de IU, pa poder escribir el mismu artículu camudando PP por PSOE o por IU. Pero yera del PP.

Por si acasu, aclárolo: nun dixe, nin pienso, que los alcaldes del PP seyan más ni menos corruptos que los del PSOE. Digo más: pémeque muuuuunchos alcaldes garren la chaqueta que-yos convenga, y lo que son ye, más que nada, alcaldes.

En cualquier casu, si esti señor ye un lladrón que roba a los sos vecinos, y sobre todo, que los usa en so beneficiu, quiero que lo pague, anque los que tan detrás nun seyan trigu llimpiu. (Y si no, por supuesto, que salga llibre).

Anónimo dijo...

No principal tamos d'alcuerdu. Y si en daque nun lo tamos, ¡Vive la diference!, que diría'l francés. Yo pruyo pola contraposición d'idegues, pola discusión respetuosa y enriquecedora, pol drechu a la discrepancia. Y por eso digo que la izquierda, que perdió tolos referentes, menos Castro, Chavez y Morales -que válame Dios-, anda al rodiu de tolo que suene a progre y acabe en "-ismu". Tengo que da-y, namás que nesti casu, la razón a Gustavo Bueno y a la so teoría del "pensamientu Alicia", del mundiu idegal y supersolidariu que solu esiste na imaxinación de Zapatero y el so exércitu de ilusos. Y la derecha... bono, la derecha ta atrapada poles pantasmes del pasáu. Con tal d'evitar que-y llamen "fascista" o "xenófoba" o "retrógrada" o "reaccionaria" calla cuando nun debe y nun actúa cuando debe. La izquierda solu sabe mirar p'atrás, y la derecha nun sabe mirar p'alantre. Ye la sinrazón d'esti país. Un saludu y p'alantre col blog.

Voy dexate la dirección del míu por si quies cha-y una güeyada.

http://rapiega.blogspot.com/

Un saludu.