Faciendo ruidu

Ayeri toqué nel Masaveu 55. El mi profesor de guitarra (Marco) dixo va tiempu que esti añu los alumnos díbemos facer una "audición"... y ficímosla. Equí ta el programa. Cumplióse, a nun ser porque faltó (paezme) Eduardo y tocó Marco Fragments Blues con Pablo Álvarez.

Esta semana tuve preparando los dos cancios que tocaba, pa que nun saliera mui mal y tamién pa tar preparáu pa los imprevistos (que en directo cuasi siempres hai imprevistos). Toi contentu, porque cumpliéronse los dos oxetivos: nun salió mui mal, y hebo dalgún imprevistu, pero enganchamos bien y salimos p'alantre.

Taben allí dellos amigos, que encima aplaudiéronnos enforma, colo que tovía paeció que tocáramos meyor.

La verdá ye que la cosa, pa ser alumnos, quedó perbien. Gustáronme toos los cancios, y bueno, allí hebo xente que, como dixo ún de los mis collacios... "vaya alumno de mis cojones" :-) Tocaben muncho, pero muncho, muncho. Menudu repasu que nos dieron... Prestó pola vida. Evidentemente, ún yera Ulises, y Fran García tamién me dexó cola boca abierta.

Toy xuru que si la xente oyera'n direuto música d'esta, incluso fecha por aficionáos como nosotros, gustaría-yos el jazz. Nun falla.

Aparte del papelón que ye tocar en público, prestóme, salimos enteros, y... agora, a pensar en deprender otres coses.