Testu n"asturiano Taba enquivocáu Testu n'asturiano

Paez que lo guapo ye nun camudar enxamás la opinión. "Soy asina, y nadie nun va cabiame", oyimos munches vegáes. Pero a mí pémeque hai que ser mui fatu pa nun cambiar de opinión. Nun ye bueno ser un chaqueteru, non. Pero de ún que nunca nun camuda'l so puntu de vista de les coses infiérese que nunca nun camienta ná. Lo mesmo que delles vegáes pue aldovinase que un puntu nunca nun camuda la camiseta, o los calzonciellos. Pol golor.

Sï, amigu. Delles idegues empodrecen y güelen mal. Ún pue camudar los calzonciellos ensin dexar de ser él mesmu. Y delles idegues puén camudase lo mesmo que los calzonciellos. Y como nun me importa almitir que de xemes en cuandu camudo los calzonciellos, almito que taba enquivocáu en delles coses. Voy dicir unes cuantes:

  • La rueduca'l ratón. Cuandu entamaron a sacalos con rueda, paecióme una peyeyá, inútil del too. Por embargu... reconozo que agora necesito la rueduca. Si non la tengo, el mi déu índiz ponse ca poco a acariciar el ratón nel sitiu onde tenía que tar la rueduca. Y esa sensación nun me gusta. Nun me gusta nada. De xuru que acariciar animales de plásticu col índiz ye algún tipu de perversión sexual de mui mal arreglu.
  • Los xuegos olímpicos. Creyía que yera la única ocasión na que los países podíen competir ensin matase, que hebía xuegu llimpiu, que valíen pa tener un pocoñín de esperanza na humanidá. Home, hai algo d'eso, sí. Pero agora nun m'interesen. En siendo deporte profesional, nun hai ná que facer. Ya nun m'emocionen (si acasu, delles presones que participen nellos, pero non los xuegos en sí). Ente profesionales, mandamases políticos que usen los xuegos pa pegase, dopáos y nobles y realeza... nun hai perénde coyer los xuegos.
  • La televisión. Siempres creyí que yera ún de los meyores inventos de la humanidá. Una ventana al mundu, la posibilidá de ver y deprender coses que nunca nun se pudiera, sobre too poles presones de pocos recursos. Tovía lo creo, pero tal comu ta emplegándose, pémeque nun sirve a esi fin. Pémeque ye un trebeyu del poder pa atontolinar al pueblu (que se dexa, claro). Nun niego que me paez meyor esto que la represión militar o relixosa...
  • Una pa arriesgase a recibir sapiazos de tolos llaos: Non, les muyeres y los homes nun son iguales. Cuidaba que sí, creyí lo que se decía de la cultura y la opresión machista. Pero ye una mentira comu una catedral. Semos estremáos. Muncho. Y non, nun ye cosa de poner a los homes a fregar los platos y pedir baxes maternales (too ello mui conveniente, por otra parte). Neninos, dexáime desencantavos: va seguir habiendo diferencies mui notables. Pa mí, polo menos.

Y otru día, más.