Testu n"asturiano Nun t'escucho Testu n'asturiano

La SGAE, la industria discográfica y delles otres partes tan enfotáes en perseguir a los sos veceros. En insultar, asustar, acusar y criminalizar a les presones que siempres sofitaron el so negociu, munches veces pagando unes perres que nun teníen. Agora tamién se meten nes bodes.

Dempués de lleer delles páxines que despliquen lo que pasa colos grupos y los artistas, cola nomá piratería, lo que pasó colos CDs, y dempués de ver cómo se tan portando cola xente que quier la música, pémeque va llegando la hora de enfrentase a too esto. Tamos aportando a un puntu nel que ún nun sabe si pue xiblar un canciu o non, si pue deprender a tocar un canciu cola guitarra, incluso de oyíu (nun digamos si daquién te pasa la partitura). Ye comu si hubiera pedir perdón por sentir música cuandu va pela cai.

Y si el so negociu ye esi, si la so misión na vida ye poner trabes pa tolo que tenga que ver cola música, cobrar por too, reñir por too, amenaciar por too, facer a ún preguntase a ca pasu si ta faciendo bien o no, comu si fora un criminal... Si el so negociu ye esi digo, pémeque ye hora de deci-yos: "Quedáivos con él". Porque la música nun ye eso.

¿Que quies que pague venti euros por un discu, y nun quies que escuche la to música si nun pago esi preciu? Quédate cola to música. Quédate col to discu. ¿Nun quies que la xible, que la tararee, que la balle? Ta fecho. El mundu ta llenu de xente que fai música porque ñació pa ello. Anguañu, cualquiera pue facer bona música'n casa, con cuatro perres. Y mucha xente sabe que la so música ye un arte, y que se fai pal públicu, y no pa les discográfiques. Y xente que ofrez la so música gratis, o por un preciu honrau y lóxicu. ¿Nun quies que disfrute de la to música llibremente? Pues nun t'escucho. Lo meyor que nos pue pasar a los oyentes y a los artistas ye que desapaeza toa esa gandalla que yos roba a ellos y nos insulta a nosotros.

Anque quién sabe. Son capaces de decir que si yo faigo un canciu y-y lu regalo al mundu toi faciendo dumping... Son así de fatos.

1 comentario:

Mafias dijo...

Siento comentar en castellano un post en asturiano, pero ya conoces mi opinión al respecto ;)
La SGAE siempre ha sido avariciosa, el problema es el gobierno, que les deja hacer y deshacer a su antojo, y los jueces, que se limitan a interpretar a su manera una ley que no se creó para interpretarse de la manera que se está haciendo. Espero verte en la concentración delante de la $GAE del viernes que viene :-)