Testu n"asturiano Partíu Tresparente

Taba yo pensando que daquién hebía fundar un partíu nuevu. Yo ye que nun tengo tiempu. Ye'l partíu definitivu: el Partíu Tresparente.

¿Que cuál ye el ideariu? El ideariu ye persimple.

1.- Esti partíu nun tien ideoloxía dala. Nun tien programa electoral. Nun fai campaña electoral con propuestes concretes.
2.- Los diputáos escoyíos por esti partíu nun van proponer nin debatir cosa dala. Nun van falar nel parlamentu, nin decir ná en comisión dala. Van limitase a sentir lo que dicen los demás diputáos.
3.- Los diputáos escoyíos por esti partíu van publicar les sos declaraciones de bienes ya intereses (fáigalo el parlamentu o non), y de lo que se-ys pague, van cobrar como muncho el triple del salariu mínimu interprofesional. El restu ingresarán-ylu como donativu a la Hacienda pública. (Sí, pues regalá-y dineru a Hacienda.)
4.- Ca vez que vaiga haber una votación nel Congresu, el Partíu Tresparente tendrá preparáu un sistema de votación abiertu a tol mundu. Los diputáos del Partíu Tresparente llimitaránse a votar lo que salga nesa votación. Si el Partíu Tresparente algama dellos diputáos, votarán na mesma proporción que haigan votáo los ciudadanos.
5.- Si nun se pudo entrugar a los ciudadanos, o el asuntu nun tien munchu interés, los diputáos del Partíu Tresparente abstendránse.
6.- Los candidatos a diputáu pol Partíu Tresparente nun se presenten a eleiciones primaries, nin congresos, nin nada. Cualquiera pue apuntase, y escuéyense a sortéu pa ca llexislatura. Lo que inhabilita a una persona pa ser diputáu pol PT ye habelo sío ya en dalguna llexislatura anterior.

Ye una idega tan inxenua como tantes otres que siento a la xente cuandu fala de política. Asina que... sí, ye permala. Por exemplu, a ver cómo faes cumplir a un diputáu del PT el so papel, cuandu ya lu escoyeron y ta aforáu y pue facer lo que quiera.

Pero tien delles ventaxes. Lo de los escaños en blanco ta bien, pero pue ser que tú creas na democracia y quieras exercela más, non dexar escaños en blanco; dexar escaños en blanco val como protesta, pero non como propuesta alternativa.

Además, los escaños en blanco permítente protestar ensin moyate, ensin facer nada. El Partíu Tresparente sigue creyendo que la responsabilidá, xunto cola soberanía, ye de los ciudadanos. Nun ye pa que los ciudadanos nun faigan nada; ye pa que faigan más.

Ventaxes aparte, tamién tien problemas; eso de organizar votaciones nun ye tan fácil, y el votu electrónicu nun ye tan perfechu como dalgunos creen. Pero bueno, eso son detalles d'implementación... El casu ye que los ciudadanos diben poder, polo menos nes votaciones importantes, facese oyir nesi momentu, non dos o tres años enantes o dempués. Los diputáos del PT nun diben trabayar muncho, por eso nun mereceríen facese ricos que digamos, pero tienen una responsabilidá, así que un sueldu razonable por nun facer casi ná sería esi triple del salariu mínimu.

Asina que ya sabéis, chavales: Partíu Tresparente. Si nun te dexen tomar el Congresu pola fuercia (y taría mal, además), si el sistema democráticu de eleiciones ca cuatro años nun te gusta... fai una adaptación usando los mecanismos del sistema. Invade el Congresu democráticamente.