Testu n"asturiano ¡Ataca, Otto!

La autocrítica paezme un exerciciu de lo más saludable. Pero lo que nun acabo de entender ye cómo el responsable d'un grupu de persones azuza a la opinión pública en contra. Nun entiendo pa qué, nun entiendo por qué. Y cuandu, además, eso se fai ensin necesidá y ensin xusticia. Eso sí, como nesti país la envidia y la mala uva funcionen, ye perfácil buscar aplausos azuzando los perros escontra dalguien. Siempres va haber muncha xente que se suba a esi carru.

Por exemplu, abúltame impresentable que un entrenaor d'un equipu diga que los so xugaores son malos y non pueden dar más. Un entraor que foi a esi equipu sabiendo cuál yera, en qué situación taba, y que se supón que va precisamente pa convencer a los xugaores de que puen ganar más partíos (porque puén, eso ye seguro). Que la zancadilla te la ponga un xugaor contrariu ta mal, pero que te la ponga el tu entrenaor, nun momentu sicolóxicu crucial... nun hai quien lo entienda. Envede pensar en ganar partíos, ta pensando en disculpase.

Abúltame tamién impresentable que'l Secretariu D'Estáu d'Alministraciones Públiques, Antonio Beteta, contribuya a dá-y más créditu a esa versión de los funcionarios que diz que son xente que ta tol día lleendo el periódicu y tomando'l café. Pero que al tiempu diga que'l so salariu nun pue vinculase a la inflación. Pide que los funcionarios sean más productivos, con responsabilidá y humildá, que non sumisión, pero al tiempu que los pon de vagos. Quier motivación y responsabilidá, desmotivando y siendo irresponsable.

Too esto dizlo Beteta nun foru, Aragonex, nel que supongo que tomó dalgún café. Y podíamos preguntá-y cómo ye de productivo que vaiga ehí a falar, envede tar trabayando na so oficina.

¿Tá bien un secretariu d'estáu pa les alministraciones públiques que nun cree nos sos alministráos? ¿Tá bien, por exemplu, un empresariu que despotrique de los sos trabayaores, poniendo como exemplu a ún que robó material de la empresa, y los llame a toos lladrones?

Y además, si los funcionarios son unos vagos que tan tol día desocupáos, ¿qué sentíu tien la medida del gobiernu d'ampliar la xornáa llaboral? ¿Ye pa que tean más tiempu lleendo? Si quier mayor productividá, ¿nun sabe que a más tiempu menos productividá, por definición?

Otru exemplu de lo mesmo: un rector que, ¡nel discursu d'investidura!, dedícase a falar del absentismu de los sos compañeros. Nun discursu d'investidura nun hai muncho tiempu, y una institución como la Universidá ye grande y complexa, y hai munches coses que decir. Pero atopó tiempu pa falar de profesores que saquen la baxa cuandu tienen clases, y'l alta cuandu nun tienen.

Yo, que nunca nun atopé cosa tala, supongo que'n otros sitios debe de haber milenta casos, si fala d'ello como ún de los problemas señeros de la universidá. Por embargu, güei diz el Vicerrector de profesoráu que son "una docena casos".

Nesa Universidá hai unos 2.000 profesores. Si envede una docena casos fueren 20, tamos falando del ún por cientu de los profesores.

Yo digo que a esa xente, si esiste, hai qu'echala a la cai. Pero dexando eso aparte, ¿tien llóxica que ún escueya falar, precisamente nesi marcu y nesi momentu, d'un problema anecdóticu y pintorescu que tien con un profesor de cada 100, cola imaxen falsa ya inxusta que eso tresmite a la sociedá?

El que lo entienda, que me lo desplique.

Lo que sí se con seguridá ye que, mentantu, los xugaores del Sporting quieren ganar partíos penrriba les sos llimitaciones, los funcionarios (la mayoría) faen que la alministración funcione (muncho meyor que la mayoría de les empreses), y los profesores quieren que los sos alumnos deprendan.