Sutton Foster

Pa nosotros, eso de Broadway ye una cosa de los americanos (del norte). Nun dexa de tar un poco mitificáo; si España fora una potencia mundial, envede el cabaré o Broadway tendría prestixiu Lina Morgan, el destape, la zarzuela y coses asina (o más casposes tovía). Prestixiu xustificáu, de xuru; la música ye música, les canciones canciones, el entretenimientu entretenimientu. Güey morrió el gran Quique Camoiras, y tou seguru de que nun yera peor actor que Jerry Lewis o que Brad Pitt.

Pero bueno, hai dalgunes coses que mueven a almiración, xéneros aparte.

Esta muyer supongo que ye totalmente desconocía en España. Y nos Estaos Xuníos, fuera del xéneru del musical, supongo que casi. Pero merez la pena echar un güeyu a lo que fai. Ella... y los demás que tan alrodiu d'ella.

Primero voi poner un par d'escenes d'un ensayu con periodistas. Ye, ná menos, que del musical Anything goes, una obra de Cole Porter, que estrenóse en 1934 y de la que salieron cancios como I get a kick out of you, You're the top, It's de-lovely, o la mesma Anything goes.

Gustos aparte, si nun te impresiona que esta xente seya capaz de baillar y cantar con esa precisión ocho minutos seguíos... ensin que se-yos escaeza un pasu, ensin que-yos falle el aliendu... Y en particular Sutton Foster, una moza delgaúca, llarga, amable, pero dime si nun fai falta una fuercia sobrehumana pa facer esto. Y teniendo en cuenta que esto fáenlo, igual, seis días a la selmana...

La prósima vez que te paeza difícil dalgo que vas preparar, piensa en cuántes hores, y años, d'estudiu hai qu'echá-y namás pa tar meramente preparáu pa entamar esto. Y dempués de ser namás que capaz, en cuántes hores d'ensayu faen falta pa deprender el canciu y la coreografía y que too salga ensin erros. Pero pa enriba, tien que paecer fácil, suave, ná tenso. Pero por si to eso fora poco, dempués de más de cinco minutos de claqué pegando saltos y desafiando a tou un cuerpu de baille, tienes OCHO compases pa garrar aire (ensin que se note) y cantar el final.

Lo dicho, esto ye un ensayu pa la prensa de la versión que ficieron en 2011 (y ta en cartelera). Too lo que sigue pue facese llargo, ya lo sé, pero yo véolo y... nun tien desperdiciu.



Esta otra escena ye del mesmu ensayu, pero agora ye un dúo, onde pue vese que Sutton Foster, si fai falta facer el gansu, ye la cosa más gansa que hai baxo la capa'l sol. Ensin desaxerar nin facer xestos ni aspavientos, paez una persona perespresiva. Supongo que esi ye el oficiu que se necesita pa tresmitir emociones dende llueñe, dende un escenariu. Como cantante tamién paez fecha pa esto; tien una voz aguda, precisa, potente. Non la voz más guapa del mundu pa cantar (ensin ser fea), pero la voz que dexa que se entienda lo que diz na última fila.



Non too son ensayos ensin maquillar: esto ye lo que queda cuandu, aparte de ser gansa, hai que ser sofisticáa y glamurosa, y hai que facer un papel delantre'l públicu. Sí, esa ye la mesma muyer.



Pero anque seyas una actriz de Broadway, y tengas dos Tonys na estantería de casa, si te llaman pa una clase nuna academia, vas, escuchas a los alumnos, falas con ellos. Cola cara llaváa. Y dices que vas a deprender d'ellos:



Y tornando al glamour, al escenariu, equí ta cantando un canciu de Chess, un musical que escribieron Björn Ulvaeus y Benny Anderson (sí, los de ABBA) con lletres de Tim Rice. Esta muyer ye dalguien que nun sabe namás cantar, sabe interpretar, muncho, pero non demasiao como pa paecer histriónica... Vamos, que menudu oficiu. Nun tien uno, tien tres. Cuando otres dicen "soi cantante, actriz y baillarina"... éntrame la risa. Esto paezme maxistral; nun sé por qué, pero namás velo entamar y ver la espresión de la cara de Sutton ya me dexa ablucáu, ya me mete nun puñu y nun me muevo hasta el final.



En fin, en Youtube hai milenta vídeos de Sutton, cantando pero tamién falando, nel backstage, grabando discos... Pues curiosear, y ver una muyer que, home, nun nació fea, pero al tiempu nun dexa de ser una que podíes ver tranquilamente comprando repollu na plaza. Pero de xuru que-y apasiona lo que fai, que vive cola enerxía arriba. Y que tuvo suerte, pero tamién trabayó como una perra.

Nun sé, a mí lo que fai paezme ablucante.