Testu n"asturiano Ayeri jam nel Pizarra

Ayeri foi al Pizarra Café, y hebía jam session. Tocaben Adrián Carrio, Carlos Pizarro, Alejandro San Pelayo y Jaime Moraga.

Pa mí ye un luxu ver tocar xente como esa, gratis... Hebía mui poca xente. Supongo que pasaríen el día'n familia, o dalgo asina.

Dempués de tocar ellos un par de coses, Pizarro ya taba invitando a que la xente subiera a tocar, pero esperé un poco más, que quería oyilos a ellos :-)

Al final, acabé subiendo, y tocamos, a propuesta mía, Bluesette y There is no greater love. Metí la gamba a gustu nes dos, pero salí p'alantre, que yera lo que se buscaba, y disfruté. Lluéu, enantes de que yo baxara, San Pelayo y Moraga punxéronse a tocar dalgo que yo conocía, anque nun m'alcordaba del títulu (yera Footprints). Desesperáu, quixe buscala nel Real Book, que tenía ellí, pa polo menos poder mirar el papel, y pregunté-y a Adrián qué tema yera esi, y díxome: "Na, un blues menor". Eses foron toles pistes XD Busqué, yera do menor, y toqué... lo que pude. Y ya me quité, que yera meyor que tuviera ellí Pizarro...

Lluéu subió dalguna otra xente, ficieron coses prestoses, y volvieron a llamame, y tábemos namás San Pelayo, un baterista y yo. Y San Pelayo púnxose a improvisar el tema, que él ye muy d'eso... Vamos, que nun yera canción conocía dala; yera totalmente improvisáo. Díxome "Sol menor", y hala. Eso a mí nun se me da tan bien como a él...

Y bueno, lluéu ya tocaron otra vez los pros. Menudu destrozu cubista ficieron con All the things you are... Qué fieres, y qué gamberros. Tremendo.

De novedá, lo que más me llamó la atención foron dos coses. Una, la manera que tien San Pelayo de interactuar col restu'l grupu. Tolos buenos músicos lo faen, y muncho, pero paecióme que esti failo tovía más. Tol ratu prueba coses, toca pedales, aporta idegues y lleva a los demás a tocales... Foi increíble.

La otra cosa nueva foi conocer a Pizarro. Ya lu viera tocar con Buensuceso, nel conciertu de Peter Bernstein. Y otra vez. Otra vez que topeto con un músicu tremendu, que por embargu ye cercanu, amable, mira pa ti (y non por enrribal'costazu), felicítate polo bien que tocaste anque seyas un tuercebotes, y al final del conciertu vien, siéntase na to mesa, charra contigo, pregúntate... Otra persona más pa almirar.

Pa otru día he conseguir que un par de amigos míos vengan y suban tamién a pasalo un poco mal y un mucho bien :-)

1 comentario:

Niña hechicera dijo...

:)...........