El otru día na Pizarra, y lluéu nel Blanco Satén

El vienres pasáu hebía jam session en La Pizarra. Y el mi profesor díxome que fuera. Pero que fuera pa tocar.

Y fui, lo primero porque quería ver tocar a los pros (Adrián Carrio, Marco Martínez, Toni Cruz y Jaime Moraga). Y lluéu, a los "espontáneos". Y lluéu... pues sí, acabé tocando yo.

Ye una esperiencia eso de tocar con xente que almires. Yera tarde (toqué el últimu) y "esta xente querrá marchar pa casa", así que toqué dos temas y fice por que nun foran mui llargos. Y tocamos Like someone in love y All of me.

Like someone in love ta, de cutio, en Eb. Pero yo estudiárala, precisamente, pa practicar cambios de tonu, y el mi maestru fízome tocala tamién en Ab, y al final quedara asina. Cuando subí, pedí-yos a los músicos que si podíen facela en Ab... y tuvo bien comprebar que sí, que faen coses d'eses. A los demás cuéstanos un trunfu facer eso. Sólo por ver dalgo asina, merez la pena el exerciciu y los apuros.

All of me toquéla nel tonu que ye, pero nun falamos un ren, nin de cómo entamar nin de cómo acabar; punxímonos a tocar ensin más. Y pa acabar, yo fice un final que faigo a veces colos mis amigos. Nun ye que seya complicáu, pero el casu ye que a estos nun yos dixe nada, procuré tocar claro, y siguiéronme (¡o anticipáronme!) como si me lleeran el pensamientu. Otra lleición gratis. Ye increíble tocar con xente que sobre la marcha entiende lo que pienses, adivínalo, y paez que taba too ensayao.

Bueno, total, que foi un honor tocar con xente como esa, y toi-yos agradecíu de que se rebaxen a tocar con xente como yo y pue decise que a dame clases. Fízome muncha ilusión.

Y el próximu día 17, dellos alumnos de Marco tocamos con él nel Blanco Satén.

Valme más estudiar de firme...