Patrulla Dixie en Avilés

Ayeri tuve viendo a Patrulla Dixie na plaza'l Carbayéu, n'Avilés. Y hebo de too, bueno y malo.

Lo bueno ye que me presta muncho que daquién se dedique a esti xéneru, al jazz antiguu, que pémeque hai que seguir cultivando; dafechu, tocaron dalgún tema compuestu per ellos. Ye música vieya, pero más vieyu ye Bach, y nun dexa de ser xoven; y esta música, lo mesmo. Ayeri pudimos velo.

Otra cosa buena ye que sonaben perbién. Nun me paez un xéneru fácil, y cuandu tocaben toos xuntos, sonaba coordináo, perguapo. La verdá que me paeció una banda de lo más solvente.

Pero tengo que decir lo malo, que paez que siempre digo que los músicos locales lo faen too bien. Una cosa mala ye que, curiosamente, anque tocando xuntos, que me paez perdifícil, sonaben a gloria, dalgunos solos (nun voi decir cuáles) nun me paecieron nada acertáos.

Pero sobre todo, ye que nun acabo d'entender por qué un conciertu anunciáu pa les nueve y media la nueche entama a les once menos venti. A les nueve y media, los únicos que taben pol escenariu yeren los téunicos. A les nueve y media pregunté-y a ún y díxome dalgo asina como "No, tovía falta, toquen a les... bueno, nueve y media, tienen que tar al caer". Ya vi el percal, marché a mercar un bocadillu, aporté a eso de les diez, y taben nel escenariu. Pensé que llegaba tarde, pero non; taben probando. Y dixeron pol micru al públicu presente: "Bueno, pues ná, vamos comer dalgo nun momentín y entamamos a les diez y media en puntu".

Nun cargo les tintes contra Patrulla Dixie; supongo que tendríen motivos de pesu pa entamar una hora más tarde de lo previsto. Y tristemente ye un vezu ente los músicos, entamar a la hora que-yos da la gana. Munches veces (nun sé si yera esti el casu) porque "esperan a que venga más xente". El resultáu ye que la xente que vien tarde ye más importante, y recibe más atención, que la xente que se apuró pa ser puntual. Toi un poco fartu.

Namás que sepan ellos y tolos músicos que llean esto que, con motivos de pesu o ensin ellos, hai xente que va a una ciudá o un sitiu específicamente pa velos, que se organiza pa llegar a la hora, y que si el conciertu entama una hora más tarde, pues acaben de tirar una hora y de apurase pa ná.

Pero bueno, en conclusión: que la música de Patrulla Dixie encantóme. Prestóme pola vida volver a oyir Royal Garden Blues, Saint James Infirmary, y tantes otres canciones que foron coles que me enamoré del jazz, oyendo a Louis Armstrong y a la mítica Canal Street Jazz Band. Ah, y aquel Sugar que tanto me prestara con Peggy Lee, y que escaeciera va tiempu. Gracies, Patrulla.