Testu n"asturiano ¿Wikileaks?

Wikileaks ye periodismu, del que facía muncho que nun se veía un ren. Por una vez, por una, salen a la lluz documentos que'l poder nun quier que salgan, y nun los filtró un ministru o un empresariu pola so conveniencia. El responsable ta perseguíu y encarceláu con pruebes febles, y los presidentes de los países trátenlu de criminal por decir coses que son verdá y que ficieron ellos.

Vamos, que eso ye la definición pura y dura de periodismu. Un 10. Eso hebía ser lo normal, hebía ser lo que pagáramos nun periódicu, pero güey nun se fai enxamás.

Pero ¿ye un wiki Wikileaks?

Toos sabemos lo que ye un "wiki". La xente collabora direutamente nos conteníos. Pero en Wikileaks paez que tienes que unvia-yos los documentos, y un comité editorial fai un resumen y entós cuélguenlos. Vamos, que la xente de Wikileaks, polo que paez, trabaya direutamente coles fontes de la información. Además, los documentos más importantes nun tan colgaos na rede ensin más; Wikileaks dá-yoslos a dellos periódicos pa que los espublicen, y lluéu cuélgalos, y además failo a puquitinos.

Pa enrriba, güey foi por primera vegada a ver el sitiu, y diome por pinchar nun documentu a bultu, ún ensin muncha relevancia política; y nun ta disponible esi documentu.

Vamos, que me paez que la parte "wiki" de too esto ye lo que menos yos importa. Eso del wiki val-yos pa tener una marca identificable y que la xente sepa ónde mandar les coses, pero namás. Wikileaks nun ye un wiki, ye una central de chivatazos, una axencia de prensa non comercial, quiciabes la única axencia de prensa verdaera.

Que nun ye poca cosa.