Estrelluca y decente

Siempre pongo pingando a les guapines que se meten a cantar y que -por talentu que tengan- dedíquense a exhibise, non a facer música. Y ya nomé delles veces a Christina Aguilera. ¿Ye que yos tengo manía a les figurines?

Non.

Güey voi poner a una guaja que, polo visto, ye conocía nos Estáos Xuníos porque sal dende pequeñuca nuna serie, y lluéu entamó a cantar. Vamos, una guaja actriz. Arrrrrr.

Pero demuéstrase que se pue facer un trabayu decente, aun siendo una guaja actriz.

Esta ye Renee Olstead, con 16 abriles, cantando... nel festival de jazz de Montreux. Igual ye un pocoñín fuerte eso de cantar en Montreux, o igual ye que esi festival nun ye lo que yera. Pero el casu ye que asina sí se pue cantar una canción. Nesti casu, un clásicu, Is you is or is you ain't my baby. Esa voz a veces tien un pelín de repu, tien un poco de ñariz, pero tamién tien perehí un posu mui interesante... bueno, escucháila. Yo creo que tien condiciones.



Tengo razones pa pensar que esta moza nun-y llega al calcañu, por exemplu, a Mapi Quintana; y tampoco vamos decir que ye un fenómenu natural, fálten-y dellos fervores (anque tamién hai que tener en cuenta que ye perxoven). Con too, lo que fai nel escenariu ye milenta veces más serio, más decente y más musical que lo que faen otres. Ye más discreta, tien meyor gustu (anque de xuru que se nota la mano del so productor, David Foster), da la mitá de notes o menos.

El tiempu dirá por ónde tira. Pero así, sí.

Bueno, y ensin ánimu de comparar, el gran Louis Jordan cantando la mesma.