Testu n"asturiano Hiyab

Vamos ver puntu por puntu de qué va esto.

Hai un colexu que tien una norma que diz que nun se pue tar dientro cola tiesta cubierta. Nin gorru, nin gorra, nin pasamontañes. ¿Ye una norma asumible? Abúltame que sí. Nun desiste, na nuestra sociedá, una vergüenza insoportable por dir cola cabeza desnuda. Ye un usu social tan normal que nun se pue argumentar eso (si acasu, lo raro ye lo contrario). Por otru lláu, hai razones (dalgunes tamién d'usu social, otres llóxiques) pa dir, dientro un aula, cola cabeza descubierta, y cola cara descubierta.

En siendo una norma asumible, tenemos una gua.ha de dieciséis años que diz que esa norma pa ella nun val, que ella va como-y da la gana. Ye idega d'ella, encima, y los pás baillen al son que toca ella (y tovía lo dicen... suponiendo que seya verdá). Y xuega col drechu a la escolarización, pa que tanto los pás, como la escuela, reculen y cambien la norma.

A mí paezme que nun tienen que camudar esa norma. Que nun pue dir a la escuela cola cabeza tapada. Y ya tá. Y si nun va, pues multa pa los pás, y si va col caperuchu, castigáa, o lo que se faiga col que va a la escuela con pasamontañes. De momentu, los gua.hes de 16 años nun dicten les normes nes escueles. (Lo que sí hai que facer, claro, ye escuchalos, y si la norma ye inxusta por dalgún motivu argumentable, hai que falalo).

El asuntu de la relixón ye secundariu. Que esta gua.ha diga que la so relixón la obliga a dir cola cabeza tapada ye problema d'ella. Que aplique esa norma de puertes de la escuela pa fuera, onde ye llibre de facer lo que quiera. La relixón ye un asuntu priváu, y el estáu, o les autoridáes educatives, nun tienen que sentase a valorar si un rasgu relixosu ye importante o non, si una creencia relixosa ye o non más respetable que otra, si hai que cambiar el reglamentu o non pa acomodar una creencia relixosa particular. Pa la relixón, respetu como cosa privada que ye. Y precisamente por respetu... oídos sordos.

9 comentarios:

Esfer dijo...

La "nuesa sociedá" tien que dase cuenta de que ta cambiando cola xente que la conforma (y esta xente, que vive, estudia y trabaya equí, tamién son parte d'esta sociedá) y pue ser que agora nun sea una norma asumible.

Porque les prohibiciones fáense en base a lo que ye "normal". Igual que equí fízose normal que les muyeres nun enseñaran les tetes pero en sociedáes de otros sitios lo normal ye llevales al aire (y esto tamién tien que ver cola relixión).

A mí paezme que montar esti pollo por un pañuelu que nun molesta un res ni molesta pa la actividá que se desarrolla nel colexu ye coxésela con papel de fumar. Otra cosa sería que la moza llevase una radio y pusiese música pa mangase a rezar.

Si un nenu tien cáncer y tien que usar gorra pa tapar los efectos de la quimio... ¿van ponese igual de duros? ¿Y si usa peluca? ¿Eso ye admitible? Puestos a poner normes que nun ayuden a mantener un comportamientu adecuau pa impartir clase puen ponese a prohibir teñise, o llevar cadenes, o la puñetera power balance.

Nun me gusten les relixiones, pero gústame menos tovía cuando la xente aprovecha triquiñueles que nun taben pensaes pa eso pa dar la nota y de pasu facer dalguna cruzá personal.

Guti dijo...

El tu puntu de vista paezme abondo razonable. Digo más; esto del pañuelu nun me paez una cosa simple.

Claro que les normes indumentaries tan basáes na costumbre; pero eso nun cambia de un día pa otru. Y el pañuelu, como prenda, pa dar la clase nun molestará más que les gorres. Pero el casu ye que tan prohibíes. Si un neñu tien que llevala pol asuntu de la quimio, de xuru que-y lo permiten, y lo apoyo. Les normes tan pa aplicales con xacíu común. A lo que voy ye a que...

...Si una creencia relixosa ye motivu pa dexar a ún saltase les normes, les normes dexen de valer, porque les supersticiones son llibres y nun hai que xustificales.

...El pañuelu na cabeza nun quita a naide de ver la pizarra, pero esi mesmu argumentu ye el que saquen los partidarios de los crucifijos y semeyes de santos nes escueles.

El mensax que tien que dar la escuela ye: "Equí manden la ciencia y la ética." Si una norma ye papel moyáu pa una musulmana por selo, el mensax que se transmite ye: "Equí manden la ciencia y la ética, pero por enriba d'elles, los clérigos seguidores d'un paisanu del sieglu VII." Nesi pulsu nun se pue ceder porque se-y meta na cabeza a una fanática de 16 años.

El restu los escolinos lleven gorra, naide nun-yos lo quita. Quítenla al entrar, y está.

Too ello sin perxuiciu de que, efectivamente, equí entren, en muchos casos, motivos xenófobos. Pero esi casu nun ye el míu.

Esfer dijo...

Que el tu casu nun ye xenofobia téngolo claro... perdona si te paeció del otru comentariu que insinuaba que yera el to problema, na más lloñe de lo que quería dicir. Lo que sí te digo ye que me da que n'esi colexu un poco d'eso debe haber 8-).

Que exista una norma nun quier dicir que sea una norma xusta. La costumbre y los años nun dan razón porque sí. Costumbres arraigaes en esti país yeran que les muyeres nun tuviesen los mismos drechos que los homes hasta fai cuatro díes por exemplu.

Los símbolos relixiosos nel colexu son "imposiciones" pa toos los que van a esa misma clase (y hasta proselitismu si me apures). Que un lleve un rosario al pescuezu, o una cruz, nun creo que sea proselitismo
y más bien entra dientro de la llibertá personal sin que nadie se tea que sentir molestu por ello (tamos falando de tapase la tiesta, no de dir en pelota). Porque a mí nun me dexaben dir en pantalón cortu a clase porque yera "antiestético" (y pueo entendelo), pero un pañuelu tapando el pelo nun me paez que sea ni antiestético ni anti nada.

Amás tener esti xestu dexándola dir como-y dé la gana nun cuesta un duru, ni trastoca la vida de los compañeros. Nun ye como si se obligase a cerrar el colexu en Ramadán o que toa la carne que se comiese en colexu tuviese que matase mirando pa la Meca...

Porque pa mí, tener vacaciones en semana santa y Navidad, tampoco ye de estáu aconfesional. Porque toy por apostar a que en cuaresma nun se sirve carne nos colexos. Pero como nun molesta, tampoco pasa nada...

En definitiva, que montar esti pollo, yeran ganes de dar la nota. Y en mi opinión, con una gotina de xenofobia de por medio.

Guti dijo...

En definitiva, que montar esti pollo, yeran ganes de dar la nota. Y en mi opinión, con una gotina de xenofobia de por medio.

D'alcuerdu, y que hai xenofobia en too esto... a raudales, tá claro.

Pero tar d'alcuerdu con Batasuna en una cosa nun convierte a naide en terrorista...

Los argumentos sobre que esa regla nun seya necesaria puen ser válidos, pero taremos falando d'otra cosa (de sombreros y ropes en clase). Lo que digo ye: ¿les creencies relixoses particulares valen pa saltase les normes en vigor, y además en dalgo que nin siquiera ye un imperativu neses creencies? Yo digo que non.

Esfer dijo...

¿les creencies relixoses particulares valen pa saltase les normes en vigor, y además en dalgo que nin siquiera ye un imperativu neses creencies? Yo digo que non.

Les normes pónense con un fin determinau. En esti casu, seguir una norma de buena educación que, ciertamente, nun entiendo que haya que poner por escrito habiendo un profesor pa indicar que les gorres y los sombreros hay que quitalos al entrar en un espaciu cerrau.

Garrase a una norma como a un clavu ardiendo pa prohibir algo contra lo que nun diba la norma ("espíritu de la ley" como diría el presidente) diz más del que juzga que del juzgau. Recuérdame, levemente, a cierta amnistía que hubo n'esti país y que pedíen los comunistas. El espíritu yera amnistiar a los que taben na cárcel, al final amnistiaron a los carceleros.

Vamos, que "tragar" con esta "norma relixiosa" ye gratis. Monetaria y conductualmente hablando. Naide se pue sentir agredíu porque una compañera lleve un pañuelu, ni quita visión a los que se sienten detrás, ni interrumpe la clase, ni mete ruiu, ni na de na.

Dar clase de relixión católica nos colexos cuesta monetaria y conductualmente a España. Practicando proselitismu en espacios públicos pagaos por toos. Eso por nun falar de colexos concertaos onde les monxes van más tapaes que eses nenes...

Guti dijo...

"tragar" con esta "norma relixiosa" ye gratis. Monetaria y conductualmente hablando. Naide se pue sentir agredíu porque una compañera lleve un pañuelu, ni quita visión a los que se sienten detrás, ni interrumpe la clase, ni mete ruiu, ni na de na.

Cuidáo, que eso mismo ye lo que dicen los de los cruficijos en clase. Y a mí nun me val :-)

Ceder nestes coses puen salir aparentemente gratis "monetaria y conductualmente hablando", pero a mí paezme que non, que sal mui caro.

Otru apunte: la norma de les gorres nun tenía que facer falta, pero faila, y sé de lo que falo. Si nun lo pones por escrito, vendrá el guaje a la escuela y dirán-y: "Quita esa gorra, que nun te veo los güeyos". Y él dirá, garantízotelo: "Non". Y garantízote tamién que llegará al Constitucional si fai falta, y en dalguna instancia darán-y la razón a él, y el maestro ya pue meter la llingua en culo. Garantizao.

¿Que dalgunos se agarren a la norma por motivos tramposos? Sí, tá claro. Pero eso ye un xuiciu de intenciones, de conciencies. Yo creo que los actos son correctos nesti casu.

Si mostrar a toes hores sumisión al so dios ye tan, tan importante pa esta guaja, que vaya a otru institutu, que ya-y lo ofrecieron. Esa ye una solución na que todos pueden ceder un poco y salir satisfechos. Pero nun-y val; toos tienen que pasar pol aru d'un caprichu d'una guaja de 16 años.

Ye una obligación educativa enseñá-y que les coses nun funcionen asina.

Esfer dijo...

Cuidáo, que eso mismo ye lo que dicen los de los cruficijos en clase. Y a mí nun me val :-)

Home el equivalente nun ye colgar un crucifixu na clase (que tien ciertu "poder" sobre los nenos) sino prohibir a los guajes llevar cruces colgaes del pescuezu. Y hasta onde yo sé, eso nun ta prohibío.

Si la norma de les gorres fai falta porque igual el constitucional yos da la razón... igual ye que tien que permitise a los guajes dir con gorra (que siempre que nun sea un sombreru de copa y moleste al de detrás tampoco lo veo algo tan SUMAMENTE grave).

Lo de dir a otru insitutu sí que nun me val. Porque vamos, creamos un institutu donde té permitío "too" y en toos los de alrededor vamos cargándonos etnies y relixiones a golpe de normes hasta que tengamos a toos los "raros" controlaínos en el ghetto.

Nun sé hasta qué puntu ye importante na so relixión dir cola tiesta tapá, pero aseméyaseme a que una moza española té obligá a dir en burka a clase en un país onde "sea lo normal, y vaya con la norma". Cola diferencia de que ellí dirán que encima la moza "distrae" a los demás guajes... O si a ti te obliguen a dir a clase en pelota, porque ye lo "natural". Pa ellos lo "normal" ye dir tapaos, hay que tener un poco de sensibilidá con "otres normalidaes".

En mi opinión ye una pena que haya que enseñá-y que actos suyos que nun molesten a naide, tien que suprimilos porque un profesor xenófobu quiso dar el cante. Por coses como esta ye como empiecen los "problemas raciales". Esa guaja ya sabe de por vida que equí nun se acepten ni les costumbre más inocues...

Esfer dijo...
Este comentario ha sido eliminado por el autor.
Esfer dijo...

De hecho, ¿¿tará "prohibío por norma" eructar en el comedor?? ¿O tirar peos en clase? ¿Estornudar sin tapar la boca?

Si lo faen los guajes... ¿qué yos faen?

Yo creo que dejalos en evidencia ye suficiente pa que nun quieran seguir faciéndolo. Y con les gorres igual.