Testu n"asturiano Prius

Camiento que vamos dir viendo más y más coses de baxu consumu. Nesta época de debate sobre nucleares onde hai xente que diz que necesitamos muncha más enerxía, a mí abúltame que podemos gastar muncha menos enerxía de la que gastamos, y al tiempu vivir meyor, con más comodidáes. Vamos ver bombilles, electrodomésticos, ordenaores, teles, sistemas de iluminación, d'agua caliente, que aprovechen la enerxía envede derrochala.

Y una de les coses de les que muncha xente nun ye consciente ye lo del coche. Yo fai muncho que, si voi ensin prisa, y si el tráficu lo permite (si me puen adelantar con facilidá) voi pela autopista a 90 km/h, que ye como menos gasta el coche. Y nun ye por aforrar perres; ye por aforrar gasolina. Y siempres me entrugué cómo ye que, si baxo una cuesta llarga, nun pueo subir gratis la siguiente cuesta corta (una bicicleta, o un monopatín, fáenlo; ¿por qué un coche non?)

Toyota vien de sacar la tercera versión del Prius. Muncha xente cree que un coche eléctricu ye como un xuguete que se enchufa a la corriente, pero esti ye un coche híbridu. Ye un coche de gasolina, pero esi motor ye de ciclu Atkinson (vamos, que aprovecha más la gasolina), y tien un segundu motor eléctricu. El coche usa un motor, o el otru, o los dos a la vez si fai falta.

El motor eléctricu tamién pue funcionar como dinamo. Así que el coche híbridu lo que fai ye que aprovecha les ocasiones que tien pa recuperar enerxía que diba perdese. Por exemplu, si vas cuesta abaxo, o si frenes suave, nun gasta gasolina; lo que fai ye recargar la batería. Aparte, si tas paráu para el motor, y coses así. Total, que ye un coche "listu" que fai por aforrar gasolina y recuperar enerxía d'onde pueda.

La publicidá diz que gasta 4,0 llitros de gasolina por ca 100 km. Y pue demostrase que ye una cifra creíble:



Ehí se ve que nos caberos 485 km, nos que se usó el coche de manera realista (eso sí, conduciendo con curiáu, yendo despaciu cuando nun hebía prisa, más rápido cuando la hebía, y nun dando acelerones tontos), el gastu ye 4,1. Un viaxe de más de 60 km ensin prisa pue facese con un gastu de 3,9 llitros/100 km. Y si te metes nun atascu, como ayeri, aportes a casa col mesmu promediu, alrodiu 4,0-4,1 llitros; ye el coche ideal pa eso, porque el motor párase, y si andes a poquitinos, tira del motor eléctricu mentantu pueda. Malapenes fai ruidu, y si vas despacín col motor eléctricu, la xente nun te siente (lo cual, dicho sea de pasu, pue ser peligroso).

El coche, polo demás, aparte de perguapu ye percómodu, espaciosu, y anda; si-y pises, salta (136 caballos, acelera de 0 a 100 en 10,4 segundos). Nun hai nada que perder.

Y gasta menos enerxía.

¿Nun ye esti el camín pol que hai que tirar? De xuru que entovía pue facese muncho, muncho meyor. Pero esto güey ya funciona.