Testu n"asturiano Tá bien y nun tá bien

- El escándalu d'estos días: que Trillo dixo que traxeran rápido los cuerpos de los que morrieron nel Yak-42. Y... ¿qué? ¿Qué tenía que decir, que los traxeran despaciu, que tardaren? ¿Acasu nun diben reñilu por tardar muncho? Lo que se fizo mal (porque dalgo fízose) habrá que velo, pero cuando haiga que echase les manes a la cabeza, que seya por dalgo.

- Riñen a Zapatero polo de cómo se dio anunciu a la retirada de Kosovo, y él sal colo mal que lo ficieron otros n'Irak y noseónde más. Mecagüentó, si el anunciu esi tuvo mal fechu (y nun sé muncho de diplomacia ni otres hipocresíes, pero paezme que sí) pues dilo, acéutalo, o defiéndete desplicando por qué ta bien fecho y por qué hai que facelo asina. Pero nun salgas por peteneres. Como decíen en mi casa, "agora tamos despelleyándote a ti".

Nun fai falta más. Si la defensa ye esa, ta claro que se fizo una chapuza como una casa. Pero nun entiendo cómo ye posible, porque otres coses son difíciles (cambiar la economía), pero esto tá inventáo y nel ministeriu tien que haber milenta persones que sepan cómo hai que facelo. Chapuza clase I.

- De la clase esa que dieron nun centru relixosu financiau con perres públiques (y es que eso ye una contradictio in terminis) na que sacaben fetos muertos y desmembraos y neninos llorando xunto a Zapatero pa falar del abortu, nun sé ni qué decir.

Llevo años sintiendo a muncha xente desplicame que lo que yos molesta d'Educación para la ciudadanía nun son los homosexuales, ye'l adoctrinamientu moral y políticu del Estáu, y coses asina. Y tómolos en serio y pienso nel asuntu. Pero si fora como dicen, tenía que haber una manifestación, convocada polos obispos y Hazteoir y el foru de la familia, de diez millones de persones en Madrid, pa protestar contra esi colexu. Porque ye mui, mui difícil imaxinar un usu más impresentable, torticeru y malsanu d'esa asignatura. Y diz la direutora "En ningún momento pensé que fuese antigubernamental porque yo, directamente, me considero apolítica... Sólo intentamos vivir en Evangelio".

Tá mui bien eso de "me considero directamente apolítica" (cuánta xente diz eso, y con eses pallabres). Pero entós diba tar bien saber cómo ye que nesa presentación salen 9 cites de la biblia, pero 14 logotipos del PSOE. Zapatero vien a salir 9 veces (tantes como la biblia, nun sé si eso nun será herexía) y Bibiana Aído otres 2. Tamién salen más de 10 fotos de fetos esfarrapláos (munchos d'ellos tienen dalgo más de 14 selmanes y de xuru nun son d'abortos provocaos; dalgunos paez que tienen malformaciones).

Nun sé qué diría toa esa xente tan seria y partidaria de les llibertáes si en clas d'EpC se enseñaran fotos de calabres torturaos pola Inquisición, y máquines de tortura, al llau de fotos de obispos de la Conferencia Episcopal, pa falar de les relixones. O fotos de fusiláos de la guerra civil al lláu del logo del PP y de los sos políticos, diciendo a los gua.hes que se alcordaran pa les próximes eleiciones. Pues eso nun diba ser ni la mitá de fuerte, nin de impresentable, que lo que fizo esta xente.

Y too esto con menores, de los que güey ta prohibío hasta sacar la imaxen na televisión. Yo creo que una clas como esa ye motivu pa inhabilitar a la direutora y a la maestra. Y facer en clas esa manipulación con un menor nun ye cuestión de relixón nin de ninguna otra cosa: ye un abusu y tien que ser delitu. Así de simple.

Y too eso faise con dineru públicu (ye un centru concertáu).

Espero les reacciones de Hazteoir y del foru esi de la familia. Digo yo que como les sos postures sobre EpC nun son partidistes nin ideolóxiques, y lo que-yos molesta ye que se hiera la sensibilidá de los neños nan escuela enseñándo-yos coses terribles (como que hai homosexuales que llegalmente se casen) supongo que esta vegada pondrán el gritu nel cielu, porque esto va muncho más lloñe. ¿Non?