La mi primera canción

Fai un porrón d'años hebía un anunciu de colonia pa gua.hes que decía, ente otres coses: "Tu primera canción, tu primera colonia, Chispas". Chispas yera'l nome de la colonia.



Ye difícil facer dalgo creativo, pero muncho más difícil facer dalgo creativo y tar contentu colo fecho, a poco críticu que seya ún. Escribir bien ye difícil, pero yo llevo tola vida escribiendo (basta ver esti blog) y anque sé que nun soy Vargas Llosa asumo lo que escribo, y cómo lo escribo, igual que asumo los mis dientes torcíos. Nun me cuesta un ren.

Pero cola música nun me pasa eso. Lo que enxamás foi capaz de facer foi una canción.

Intentélo poques veces, pero les que lo intenté, dábame cuenta de que algún cachu me sonaba a otra cosa que ya taba inventáa. Al entamar, la idea paecíame buena, pero dempués d'un ratu, de sópitu paecíame malo, ramplero, ñoño. Racionalmente sabía que yera lóxicu esi sentimientu, que hebía que nun facé-y casu y seguir trabayando pa terminar el canciu... pero nun podía. Dexábalo. Nunca nun pude escribir una canción entera.

Agora, coles clases de guitarra, deprendí algunes cosuques d'armonía que, hay que decilo claramente, nun faen falta pa facer una canción, pero puen ayudar a echá-y un poco d'oficiu. Y sobre too, el mi profesor mandónos facer una canción como exerciciu. Así que esta vez nun hebía escapatoria.

Decidíme a facer dalgo más o menos simple, un tema swing, y a ser posible que sonara a vieyo, al estilu de esos grandes estándares de fai sesenta o setenta años. Y así salió But I know too well.

Ye un exerciciu, pero la verdá ye que nun me sonó mal. Y ayeri grabámoslu en clas, col mi collaciu Andrés. Sentir a otru tocar la to idega, y tocando como toca Andrés, ye dalgo increíble.

Pues equí va. La primer vez que nun tengo que pagar royalties a naide :-) El tema y el primer solo tócolos yo (acompañando Andrés, que menudu acompañamientu), lluéu va Andrés y lluéu cierro yo col tema otra vez.

But I Know Too Well [MP3 - 4,4 MB]

A ver... repasemos. Agora sí, agora ya tuve viaxes, aplausos, trabayu, amiga, canción. Agora ya pueo comprar la colonia.