All the things you are

Ayeri fice un exerciciu con All the things you are. Quería tocar despacín, lo primero, y amás tocar dexando espaciu, que ye cásique más difícil que tocar munches notes.

Dempués de grabalo y oyilo vi que nun saliera tolo que yo quería (pa eso valen los exercicios). Hai que seguir trabayando lo de los silencios. Tien su miga; nel cómic lo más importante ye lo que ta ente les viñetes, eses "cais" blanques, y na música el silenciu ye tan importante como lo que suena.

El canciu orixinal ye una braera obra d'arte, y más tovía cola lletra, que nun conocí hasta fai bien poco. Y si escuches esta versión d'Ella Fitzgerald y coles primeres cuatro pallabres nun te salta una llárima al güeyu, ye que tas fechu de tapioca.

Tú yes el besu prometíu de primavera
que fai el solitariu inviernu paecer llargu.
Tú yes el silenciu ensin aliendu de la tarde
que treme al borde d'un maraviyosu canciu.

Tú yes el brillu d'ánxel que alluma una estrella;
les coses más queríes que conozo son les que tú yes.
Un día los mis brazos felices van abrazate,
y un día voi conocer esi momentu divín,
cuandu toes les coses que yes seyan míes.

Bueno, el exerciciu equí queda pa referencies futures. Nun comparar colo que canta Ella, por favor.

All the things you are [MP3, 4,5 MB]. Grabáo'n Llamuñu, 13 d'ochobre de 2008, guitarra Ibanez Artcore AG75, amplificaor Ibanez GT40.