En Granada (IV)

Bueno, pues ya cunté la mio hestoria. Nun hebo munches entrugues al final, pero la xente atendióme y más o menos paeció-yos interesante. Lluéu fice lo que más me pruyía, moderar una sesión (entrugáronme y nun sé decir que non), y más o menos salió bien, la xente acabó nel tiempu, y nun tuve que facer munchu esfuerciu pa cortalos ni nada. Así que ya ta too lo difícil.

Los díes d'atrás, y güey, taba perequí lleno d'obreros poniendo coses perende, porque mañana vienres entama'l congresu del PSOE andaluz nel mesmu palaciu de congresos onde tamos nosotros. Dicen que vien Zapatero tamién. El casu ye que güey ya punxeron ¡tres! arcos deteutores de metales a la entrada, y avisáronnos de que traigamos les acreditaciones porque si non igual nun nos dexen pasar... Mañana tará too enlleno de policía y de delegáos del PSOE. Si veo a Bibiana Aído, pído-y que me firme un autógrafu, o autógrafa, nun exemplar de la gramática de Nebrija.

Un día mui ocupáu, porque lluéu foi la mesa redonda sobre la profesión. Conclusiones:

- La baxada de matriculaciones ye un fenómenu mundial. En toos los países les curves son semeyes.

- Esa baxada nun se desplica porque haiga menos trabayu n'informática: hai más que nunca. Muncho más que nunca.

- ¿Tien que ver cola actitú actual de los escolinos énte'l esfuerciu, o coses así? Nun se sabe.

- Gustóme muncho (qué coses, creyí que diba ser al revés) lo que dixo un representante de Telefónica I+D de Granada. Dixo delles verdáes como puños.

Aportamos un pocoñín tarde a comer, asina que namás terminar volví pa otra sesión, con coses interesantes (ún que enseñaba web semántica, y un profesor de Méxicu que falaba de práutiques n'empreses). Lluéu la asamblea d'AENUI, y lluéu corriendo pa la cena de gala. Al pie de la Alhambra, nel Carmen de los Chapiteles. Tuvo bien... Y lluéu andando pa la habitación, y pa la camina. Mañana más. Si daquién ve el telediariu, y sal el congresu del PSOE andaluz, nesi mesmu edificiu, a pocos metros, taremos nosotros (si nos dexen entrar, claro).