En Granada (V)

Pues equí toi faciendo por facer un trabayucu de la Xunta por VNC, pero la rede inalámbrica caise ca poco.

Al final, anque paecía que diba tar difícil entrar al palaciu congresos, foi cásique comu siempres. Yo cuntaba con atopar un montón de xente entrando al congresu del PSOE pa acreditase (como pasa de cutio con congresos grandes) y que les midíes de seguridá diben ser pesáes, como nos aeropuertos. Pero non; nun hebía naide (¿entamaríen más sero?) y dexáronnos pasar ensin arcos ni nada, eso sí, diciéndonos que ficiéramos por llevar puesta la tarxetuca d'acreditación tol ratu. Pero vamos, que ná.

Güey vi delles sesiones perinteresantes. Primero hebo tres sobre cómo meter competencies nos planes d'estudiu. Una d'elles diola Marián, con un métodu pa derivar too de los perfiles profesionales. Buenísima, y Marián tuvo xenial. Qué grande. Otra foi de Inés, y otra de Fermín. Lluéu Albizu presentó'l mapa de competencies que sacaron como una ferramienta mui útil.

Tamién vi la ponencia de Elena Montañés y Quevedo, que diba de cómo sacar una nota individual de les notes de un grupu; quier decise, mirando namás pal productu que saquen, y poniéndo-y nota a esi productu, cómo se pue facer pa deducir notes individuales pa cada estudiante. Ye una idega simple y brillante, que nun se me ocurriera enxamás. Hebo otra ponencia que falaba de cómo saber lo difícil que ye una entruga de test; resulta que nesi estudiu nin los profesores taben d'alcuerdu nes sos estimaciones, y les estimaciones de los estudiantes yeren abondo meyores... Ye como pa pensalo.

Tengo que facer una llista de les ponencies que más me prestaron, pa alcordame. Otra conclusión ye que hai que mirar eso de Moodle, que paez que ya hai xente enforma emplegándolo.

Güey pela tarde la xente va a una visita a la Alhambra (¡45 €!) y yo, como nun sabía si diba dir, pensé esperar a ver. Pues quixe apuntame, y dixéronme que nun hai places llibres (la primera vez na vida que una empresa nun quier vender un tiquet por 45 €). Como ya tuve, pémeque lo que voi facer ye aprovechar la negativa, nun facer por dir a la Alhmabra por otra vía, y quedame a descansar nel hotel y prebar la piscina esa, que paez que somos tontos y siempres tamos trabayando (y güey llevantéme rotu, la verdá). A ver si lleo un poco de Claro de tierra, de Clarke, que tráxelu pal avión y taba interesante.