Publicidá d'Euskadi

De cutio, los lemas de los anuncios tienen doble xacíu. Por eso me pareció ablucante el de la campaña que ficieron va tiempu pal turismu nel País Vascu: "Ven y cuéntalo". Un sitiu que ye famosu porque hai xente a la que-y peguen tiros na cabeza, o yos tiren la casa con una bomba, o vuelen el coche con ellos dientro, y dicen "vén y cuéntalo". Ye como decir "si tienes güevos ven y sobrevive pa cuntalo dempués". Paecióme una campaña mui rara, polo menos discutible.

Y agora veo que el lema ye "Euskadi, un país increíble". Siendo un anunciu destináu, nesti casu, a xente d'España, onde tan fartos abondo de la engarradiella nacionalista y nun despierta munches simpatíes, de les cuatro pallabres escoyíes pal lema, una ye pa recordanos que ye un "país", y llámenlu "Euskadi" y non "País Vascu" (que anque lleve "país" ye d'usu común y pasa desapercibío), y canten n'euskera, que fora d'allí tampocu tien mui buena imaxen (como'l asturianu, más o menos).

Nun pongo en dulda que les campañes serán buenísimes y darán un resultáu bárbaru, pero lo que ye a mí, que soi un ignorante en publicidá, paeciéronme les dos dignes de echar al que les fizo. Nun sé. (Anque nun se pue negar que nun son campañes hipócrites, non.)