Milenta cómics: Jessica Abel

Toi acabante de lleer Escaparate, de Jessica Abel, y agora toi tovía lleendo La perdida, de la mesma dibuxante.

Ensin dulda, dibuxa bien. Pero pémeque nun va convertise na mi dibuxante favorita.

Gústame que trate temas un poco personales, y gústame que sabe cuntar eses hestories. Nun fala de superhéroes, fala de xente normal y corriente. La vida de tolos díes pue ser tan interesante como les coses sobrenaturales. Nesi sen remémbrame un poco a Craig Thompson. Tamién dibuxa en blanco y prieto, con rayes clares y decidíes, anque el dibuxu de Thompson abúltame más curiáu, menos "casual". Nun ye esa la crítica que-y voi facer a Abel; ye un estilu estremáu, namás.

Lo malo ye que Abel cuenta bien hestories sobre xente... que nun m'interesa un ren. Pero nun sé si echá-y la culpa a ella o a la xente de la que fala.

Por un lláu, veo paisanos, y sobre too, muyeres, un tantu idiotas. Nun pescancio bien por qué se comporten como se comporten. Son irracionales, tienen esa triba de problemas de xente refalfiá. Pero esa xente esiste, ye verdá, y daquién tien que falar d'ellos, igual que Guy Delisle fala de los coreanos del norte (gran llibru, esi sí).

Total, que nun dibuxa mal (anque ye enforma más caótica que Thompson) y gústame que fale de coses de les que nun siempres se fala, anque la verdá ye que los dimes y diretes de los sos personaxes nun lleguen a interesame. Paécenme chismes d'institutu, de xente que tien que salir con daquién pa sentise que valen pa algo. Si les muyeres son como les pinta Jessica Abel... ay, madre.